Европын хамгийн нэр хүндтэй урлагийн тэмцээнүүдийн нэг болох 59 дэх удаагийн “Евровидение”-гийн ялагчаар Австрийн дуучин Кончита Вурст тодорлоо. “Rise Like a Phoenix” дуугаар оролцсон тэрээр хоолойны чадлаасаа гадна сахалтай эмэгтэйн дүрд хувирсан этгээд төрхөөрөө үзэгчдийг алмайруулж чадсан байна.
Энэ нь Австри улсын хувьд 1966 оноос хойш тус тэмцээнд ялсан анхны тохиолдол болж байгаа бөгөөд сүүлийн арван жилийн хугацаанд хоёр дахь удаагаа эцсийн шатанд шалгарсан байна. Үнэндээ ялагчийн жинхэнэ нэр нь Томас Нойвирт бөгөөд сахалтай эмэгтэйн төрх болон Кончита Вурст нэр нь олны анхаарлыг татах зорилготой аж. Гэвч Томасын энэхүү этгээд төрх Орос, Беларусь, Армен зэрэг ижил хүйстнүүдийг эсэргүүцэх үзэлтэй улс орнуудын эсэргүүцэлтэй тулгарсан байна. Түүнийг тэмцээнд оролцуулахгүй байх хүсэлт дээрх улс орнуудаас олноороо иржээ. Энэ удаагийн тэмцээний хоёрдугаар байрт Нидерланд, гуравдугаарт Шведийн дуучид шалгарчээ.
www.URLAG.mn
