Дэлхийн хамгийн нөлөө бүхий к-поп хамтлаг BTS албан ёсоор эргэн ирж байна. Өмнөд Солонгосын хуулийн дагуу цэргийн албаа хаасан учир хамтлагийн гишүүд бараг дөрвөн жилийн турш завсарлаад байсан. Нийт долоон гишүүнтэй тус супер хамтлаг 2022 оноос хойш анх удаа бүрэн бүрэлдэхүүнээрээ тайзнаа гарах гэж байна.
Энэхүү түүхэн тоглолт “BTS THE COMEBACK LIVE | ARIRANG” нэртэйгээр “Netflix”-ээр шууд дамжуулагдана. Энэ нь “Netflix” платформын хувьд Өмнөд Солонгосоос анх удаа дэлхий даяар шууд дамжуулж буй лайв эвент болох юм.
Тоглолт 2026 оны гуравдугаар сарын 21-нд Солонгосын цагаар: 20:00, Монголын цагаар: 19:00, баруун эрэг (PST): 04:00, зүүн эрэг (EST): 07:00, GMT: 12:00 цагаас шууд цацагдана.
Тоглолтыг зөвхөн “Netflix”-ээр ямар ч багцыг худалдан авсан бай шууд үзэх эрхтэй. Нэмэлт төлбөр, тусгай эрх шаардлагагүй бөгөөд дэлхийн хаанаас ч үзэх боломжтой.
Тоглолт Сөүлийн түүхэн дурсгалт газар болох Гёнбокгүн ордны гол хаалга Гванхвамүнээс шууд дамжуулагдана. 1395 онд баригдсан энэхүү газар нь тоглолтод соёл, түүхийн гүн утга нэмж өгч байна.
Түүнчлэн тоглолтоос зургаан хоногийн дараа буюу 2026 оны гуравдугаар сарын 27-нд “Netflix” дараагийн томоохон бүтээл болох “BTS: The Return” баримтат киног цацна.
“Netflix”-ийн лайв тоглолтын дараа BTS хамтлаг 2026–2027 онд 34 бүс нутагт 82 тоглолт хийнэ. Ази, Хойд ба Латин Америк, Европ, Ойрх Дорнод, Австралийг тойрох энэхүү аялан тоглолт нь 2022 оноос хойших анхны бүрэн хэмжээний дэлхийн аялан тоглолт юм.
