Завхан аймгийн орон нутаг судлах музейд Засагт хан аймгийн Засагт ханы хошууны тамганы хуулбар хадгалагдаж байна.
Завхан аймгийн музей нь монголын ууган музейнүүдийн нэг бөгөөд 1924 оны 12 сарын 11-нд Гэсэр сүмийн туурин дээр байгуулагдсан байна.
Өдгөө алдартны музей, орон нутаг судлах музейтэй. Хуучны сүм хийд, иргэдийн гар дээрээс цуглуулсан 10 мянга гаруй үзмэртэй 17 танхимтай ажиллаж байна. Орон нутаг судлах музейн угсаатны зүйн танхимд дэглэгдсэн Засагт хан аймгийн Засагт ханы хошууны тамгыг Монгол улсын соёлын гавьяат зүтгэлтэн Д.Дагвадорж Соёлын өвийн үндэсний төвийн зөвшөөрлөөр хуулбарлан хийж музейд дэглэжээ.
Дөрвөлжин суурин дээр барыг архиран буй байдалтайгаар дүрсэлсэн мөнгөн тамга дээр монгол бичгээр “Засагт хан аймгийн Засагт хан хошууг халхын өрнө замын баруун гарын зүүн этгээдийн захирагч тамга” хэмээн бичсэн байдаг. Өдгөө энэхүү тамганы эх хувь нь Говь-Алтай аймгийн музейд хадгалагддаг.
Засагт хан аймгийн Засагт ханы хүшууны тамганы хайрцаг Завханы музейн сан хөмрөгт бий.
1911 онд Монгол Улс манжийн дарлалаас ангижрахад Богдын засгийн газар аймгийн хаадын тамгыг өөрчлөх үед Засагт аймгийн хан болсон Содномравдан /1893-1912/ нутгийн уран дархчуудыг цуглуулан уг мөнгөн тоногтой хайрцгийг хийлгэж, Богд хаанаас тамгаа хүлээн авчээ. Завхан аймгийн архивт 1956 оныг хүртэлх хугацаанд хадгалагдаж байгаад музейн үзмэрт орсон бүтээл юм.
Монгол дархны ур ухаан хийцийг шингээсэн бүтээл. Модон хайрцгийг булигаараар бүрж, цагаан мөнгөөр тоноглож галт шувууны дүрс болон уул үүлэн хээг хөөмөлдөж урласан байна гэж Завхан аймгийн музейн захирал Ж.Юнрэндорж ярилаа.
