“Ану хатан” түүхэн уран сайхны киногоороо өнгөрсөн онд дуулиан дэгдээсэн “Шүүдэр” продакшн дэлгэцийн хоёр дахь бүтээлийнхээ постерыг дэлгэлээ. Зохиолч Б.Шүүдэрцэцэгийн “Улаан пальто” өгүүллэгээс сэдэвлэн бүтээсэн уянгын драм төрлийн энэ кинонд МУСТА О.Долгор, жүжигчин Т.Өөдөө, О.Байгаль нар болон 23-р сургуулийн сурагч Ч.Энхномуун нар тогложээ.
Эх үрийн нандин холбоо, хүний сүнс төрөл сэлгэн мөнх оршдог тухай сонирхолтой сэдвийг хөндсөн энэхүү киноы хөгжмийг гитарчин Өөжгий бичиж, зураглаачаар МУСТА С.Баттулга нар ажиллажээ.
Зохиолчийн долоон жилийн өмнө бичсэн өгүүллэгийг уншсан хүмүүс болон үзэгчдийн дунд багагүй хүлээлт үүсгээд буй энэхүү кино нь далд ертөнцийн сэдвийг хөндсөнөөрөө сонирхолтой бөгөөд уран бүтээлчид нь мөнгө хөөгөөгүй, харин өнөөгийн хүнд хэцүү амьдралд өнгө нэмсэн , өөдрөг гэгээн, хайр энэрэл ундраасан кино хийх зорилт тавьжээ.
Дүр сонголтын хувьд ч өнөөдрийн хамгийн эрэлттэй жүжигчин О.Долгор, нэгэн үед дэлгэцийн бараг бүх бүтээлд тоглож байсан жүжигчин Т.Өөдөө, 16 жил кинонд тоглоогүй О.Байгаль нарын чадварлаг жүжигчдийг нэгэн кинонд нэгтгэснээрээ үзэгчдийн сонирхлыг эрхгүй татаж байгаа ажээ. Киноны эрэгтэй дүрүүдэд МУГЖ Г.Равдангийн хүү жүжигчин Р.Баттогтох, О.Байгальтай хамт СУИС-ийн жүжигчний анги төгссөн Д.Бат-Оргил, “Ану хатан”-д О.Долгорын портнер жүжигчин Б.Батжаргал нар тоглосон байна. Гэр бүлээрээ үзэх кино – “Улаан пальто” 5-р сарын 21-нд нээлтээ хийхээр товложээ.
