Өчигдөр, өнөөдөр, маргаашийг холбон мөнх орших Монголын суут хөгжмийн зохиолч Дагвын Лувсаншарав гуай энхжингийн орныг зорин одлоо.
Шулганан хэлд орж байгаа балчирхан охин минь “Маамуу нааш ир”-ээр хөтөчлүүлэн хорвоотой танилцаж байна. Хойшдоо ч Монголын олон мянган үрс энэ дуутай хамт өсөж, торних нь маргаангүй үнэн.
Алс газар ханиа санан суухдаа энэ эрхэм “Атар хээрийг чимэглэсэн, Алаг цэцгэнд би дуртай” хэмээн аялгуу хийсэн нь аав, ээжийн минь хайрын илэрхийлэл болсон алдарт “Би чамд хайртай” болон мөнхөрчээ. Нас насны сайхныг мэдрүүлсэн сонгодог бүтээлүүдээрээ Монголын хөгжмийн урлагийн түүхэнд тод мөрөө үлдээсэн Хан бүргэд хайртай найзууд, эрхэм багш, ээж, аавыгаа зорин тэнгэр өөд дүүллээ.
Хүний хийж бүтээх хязгаартай ч түүний туурвисан бүхэн энэ хязгаарыг давсан гэлтэй. 13 настайгаасаа эрдмийн үр тарьж, ард түмэндээ бичиг үсэг заасан багш, холыг ойртуулж, хоёрыг учруулдаг тээврийн салбарын ажилтан, хөгжмийн аялгуугаар олныг уяраасан агуу хөгжмийн зохиолч. Нэгэн биед багтмааргүй энгүй их хөдөлмөрөө тэр ард түмэндээ зориулсаар 75 жилийг үдсэн юм билээ.
Хэнтий аймгийн Баянхутаг сумын нутаг Зүүн хашаатын Яндаг хутаг хэмээх газарт 1927 онд түүнийг төрөхөд аав нь эх барьж авсан гэдэг. Аймгийн клубийн жүжигчнээс Москвагийн хөгжмийн дээд сургууль төгссөн хөгжмийн зохиолч болтлоо тэр олон бартаа, саадыг давсан. Дуунаас дуурь хүртэл туурвиж, тэр дундаа найрал дуу гэдэг үгийг түүний нэртэй хоршуулан ярьтал нь алдаршуулсныг нь бодохоор Монголын урлагийн түүхэнд өөд тэмүүлсэн өндөр хөшөө босгоод буцаж дээ, та.
“Хан бүргэд”, “Хар Хорум” дуурь, “Нарны домог”, “Бөртө чоно” бүжгэн жүжиг, “Аман хуур”, “Нүгэл буян”, “Төөрсөөр төрөлдөө”, “Өглөө”, “Тэмцэл”, “Жаргал даахгүйн зовлон”- гоор түүчээлсэн олон арван уран сайхны киног үзэх бүртээ өнөө, ирээдүйн монгол түмэн үргэлж таныг дурсан хүндэтгэх болно. Харин “Маамуу нааш ир”-ийг залуу аав, ээжүүд хүүхдэдээ зааж, хорьдугаар зууны сор болсон дуунуудын дунд “Би чамд хайртай”, “Эх орон”, “Гурван тамирын уянга”, “Дурлал хайрыг минь дамжуулаарай” мөнхөд эгшиглэсээр байх биз ээ.
Зуун дамжин амьдарч, зуунаар хэмжигдэхгүй бүтээл туурвилаа үлдээгээд одсон эрхэм хүндтэй таныгаа алсын замд нь үдье дээ.
Ж.СОЛОНГО/Өнөөдөр/
