Соёл, спорт, аялал жуулчлалын яам, “Их талын жазз” төрийн бус байгууллага, Нью Йоркийн Их Сургуулийн Жазз хөгжмийн тэнхимтэй хамтарсан соёл, урлагийн солилцооны төслийн үйл ажиллагааны хүрээнд АНУ-ын Нью Йоркын их сургуулийн жазз факультетийн захирал Дэвид Шроёдер тэргүүтэй “Комбо Нуво” хамтлагийн шилдэг жазз мастер, багш, хөгжимчид болон Монголын Үндэсний морин хуурын чуулгын хамтарсан тоглолтыг зохион байгуулж байна.
“Комбо Нуво” нь Нью Йоркийн шилдэг уран бүтээлчид болох аман хуурч, уран сайхны найруулагч Дэвид Шроёдер, “Saturday Night Live” хамтлагийн ахлагч, саксафонч Ленни Пиккет болон алдарт хөгжмийн найруулагч, хөгжмийн зохиолч Рич Шимариа зэрэг бусад уран бүтээлчдээс бүрдсэн чөлөөт сэтгэмжээр тоглодог хамтлаг юм.
Тус хамтлаг нь жазз болон сонгодог хөгжмөөс аваад блюз болон олон орны ардын хөгжмийг хүртэл маш олон төрлийн хөгжмийн төрөл, жанрыг уран бүтээлдээ тусгадаг. “Комба Нуво” хамтлагийн гишүүд Майлс Дэвис, Рави Шанкар, Элтен Жонн, Ио Ио Ма, Паул Симон, Натали Кол, Дэв Дуглас, Оскар Кастро Невес, Рэнди Брекер болон Товер оф Повр зэрэг домог болсон уран бүтээлчидтэй хамт тоглож байжээ. Ийнхүү маш олон туршлагатай уран бүтээлчдийг нэгтгэснээрээ тус хамтлаг жинхэнэ жазз хөгжимийг гайхамшгийг бүтээжээ.
“Комбо Нуво” хамтлагийн бас нэгэн онцлог бол бусад улсын симфони найрал хөгжмийн оркеструудтай хамтарч тоглодог байна. Эдгээр хамтарсан тоглолтуудад хамтлаг, оркестр хоёр нэг цөм болж чаддагаараа аль аль талдаа гайхалтай тоглолт, туршлага болж чаддаг аж.
Энэхүү соёл, урлагийн солилцооны хөтөлбөрийн хүрээнд “Комбо Нуво” хамтлаг ирэх зургаадугаар сарын 1-4-ний хооронд “UB Jazz Club”-д монголын жазз уран бүтээлчидтэй хамтарсан тоглолтоо тоглох ба зургаадугаар сарын 5-д Дуурь, бүжгийн эрдмийн театрт монголын Морин хуурын чуулгатай хамтарсан тоглолтоо зөвхөн нэг удаа толилуулах нь ээ.
Эх сурвалж: eagle.mn