“Academy Awards Mongolia” кино наадам энэ сарын 13-нд болно. Энэхүү кино наадмыг зохион байгуулах комиссын гишүүн, жүжигчин Н.Отгонтогостой ярилцлаа.
-Энэ жилийн наадмын онцлог нь юу вэ?
-Гол онцлог нь шилдгүүдэд өгдөг цом маань өөрчлөгдсөн. Мөн олон улсын хэмжээнд зохиогдож байна. Манай наадамд ОХУ, Япон, Өвөрмонголоос уран бүтээлээ оролцуулахаар мэдүүлгээ өгөөд байгаа. Өвөрмонголоос хоёр кино, Японоос нэг бүтээл ирсэн. Мөн урилгаар Ази Номхон далайн орнуудын “Кино хороо”-ны ерөнхийлөгч оролцоно.
-“Academy Awards Mongolia” наадам тавдугаар сарын 14-нд болох байсан ч хойшилсон. Шалтгаан нь юу байв?
-Энэ жил олон уран бүтээлч оролцохоор мэдүүлгээ өгсөн боловч зарим нь нээлтээ хийж амжаагүй кино байсан учраас хугацааг хойшлуулсан.
-Оролцож байгаа бүтээлд ямар шалгуур тавьж байгаа вэ?
-Бүтээлүүдэд гурван шаардлага тавьж байгаа. Дэлхийн жишгээр хугацааны хувьд 50 минутаас дээш буюу 120 минут байх, кино театруудын шаардлага хангасан, мэдээж нээлтээ хийсэн байх гэсэн шаардлагатай.
-Шүүгчдийн бүрэлдэхүүнд хэдэн хүн байгаа вэ?
-Энэ жил есөн хүний бүрэлдэхүүнтэй ажиллаж байна. Ерөнхий шүүгчээр Б.Балжинням найруулагч ажиллаж байгаа. Мөн кино урлагийн тогоонд олон жил чанагдаж, “Хэлэх юмтай, хийсэн бүтээлтэй” хүмүүсээс шүүгч нар маань бүрдэж байна. Тухайлбал, кино найруулагч Г.Жигжидсүрэн, Х.Дамдин, хөгжмийн зохиолч Б.Мөнхдорж, Ардын уран зохиолч, СГЗ Б.Лхагвасүрэн, С.Пүрэв зэрэг хүмүүс байгаа.
-Төрөл жанрын хувьд?
-Янз бүрийн төрөл жанртай кино оролцож байна. Аймшгийн кино, адал явдалт гэх зэрэг.
-Өмнөх жилийн наадамд инээдмийн кино байгаагүй. Энэ төрөлд оролцож байгаа бүтээл бий юу?
-Энэ жил байхгүй. Мэдүүлгээ өгөөд бүртгүүлбэл оролцох боломж нээлттэй.
-Наадамд оролцож байгаа бүтээлүүдийн талаар таны бодол?
-Одоогийн байдлаар 10 гаруй бүтээл ирээд байгаа. Сүүлийн жилүүдэд төрөл жанрын хувьд олон болж, үзэгчдэд хүргэх санааны хувьд ч нэлээд хүний дотоод сэтгэл рүү чиглэсэн, хүнд юм бодогдохоор бүтээлүүд их гарч ирж байна гэж үзэж байгаа.
-Энэ наадмын хамгийн гол зорилго юу вэ?
-Монголын кино урлагийг дэлхийн хэмжээнд гаргах, таниулах зорилготой ажиллаж байна. Тиймээс “Монголын үндэсний кино академи” энэ онд ”Дэлхийн кино академи”-д элсэн ажиллаж байна.
Б.Пагмасүрэн
