Ховд аймгийн Манхан сумын нутгаас VII зууны Түрэгийн үед хамаарах алтайн ятгыг олсон. Харин манай уран бүтээлчид уг ятгыг гадаадад сурталчлах зорилгоор Буриад, Якут, Халимагт аялан тоглолт хийхээр болжээ.
“Домогт нүүдэлчид” тоглолтод “Алтай” хамтлаг, туульч Э.Баатаржав, яруу найрагч Д.Урианхай болон СУИСийн “Nature dance” бүжгийн хамтлаг зэрэг 20 гаруй уран бүтээлч оролцох юм байна. Мөн “Монгол уламжлал” академийн тэргүүн, соёлын гавьяат зүтгэлтэн Л.Дашням алтай ятгын тухай лекц унших юм байна.
Уран бүтээлчид энэ долоо хоногт явах ба ирснийхээ дараа “Домогт нүүдэлчид” тоглолтоо жуулчдад зориулан Чин ван Ханддоржийн өргөөнд ирэх долдугаар сарын 7-ноос аравдугаар сарын 30 хүртэл өдөр бүр толилуулах юм байна.
