Ардчилсан хувьсгалын 25 жилийн ойг тохиолдуулан "Хонх" хамтлагийг үүсгэн байгуулагч, сэтгүүлч, хөгжмийн зохиолч С.Цогтсайхан агсны гэрэлт хөшөөг Булган аймгийн Булган суманд байгуулахаар болжээ.
Энэхүү ажлыг Булган аймгийн Ардчилсан холбооны анхдагчид 2010 оноос санаачилснаар зураг төсөл, газрын асуудал нь шийдэгдсэн байна. Хөшөөний макетыг 1989 оны 12 сарын 10-ны хүйтэн жавар, салхитай өдөр дуулж байх үеийн түүхэн зургаас харгалзан гаргажээ.
Хөшөөний суурийн дээд голд МоАХ-ны анхны тэмдэг болон түүний хоёр талруу далавчлан намирах хадган дээр дууны давалгааг дэмжин босож буй хүмүүсийн дүрсийг илэрхийлэх аж.
Тэмдэгний доор “Хонхны дуу”-ны үгийг бүрэн эхээр нь МоАХ-ны тэмдгийн хамт алталсан үсгээр бичих бөгөөд хөшөө нь суурийн хамт 7,3 метр өндөртэй байх юм байна.
Зохион байгуулах ажлын хэсгийнхний зүгээс МоАХ-ны гишүүд, дэмжигчдээс журмын нөхрийнхөө гэгээн дурсгалд зориулж сэтгэлийн хандив өргөхийг уриалж, хандивын аян өрнүүлээд байгаа юм.
Н.Туяа