Ховд аймгийн нутаг дэвсгэрт оршдог түүх, соёлын дурсгалт хүн чулуун хөшөөдийн нэг нь Огторгуйн амны хүн чулуун хөшөө юм. Тус хөшөө нь Алтай сумын Барлаг багийн нутаг, Огторгуйн ам хэмээх газарт далайн түвшнээс дээш 1822 метрийн өндөрт оршдог.
Хүн чулууг 2х1.5 метрийн хэмжээтэй дөрвөлжин хашлагын дотор босгосон байна. Хөшөөний толгойн дүрслэл бүдгэрч, чулуу нь хагаран унажээ. Хөшөөний өндөр 81 см, өргөн 36 см, зузаан нь 13 см болохыг Түүхийн ухааны докторант Х.Бямбасүрэн “Ховд аймгийн нутаг дэвсгэр дэх хүн чулуун хөшөөд” хэмээх номдоо дурдсан байна. Тус хүн чулуун хөшөө он цагийн хувьд Түрэгийн үед холбогдоно.
Сонирхуулахад, Алтай сум 3000 гаруй хүн амтай. Эрс тэс уур амьсгалтай. Байгалийн төрөл бүрийн баялаг, ашигт малтмал, ой мод, амьтан, ургамал, түүх соёлын дурсгалт газар ихтэй. Тус сум нь Улаанбаатар хотоос 1400 гаруй км, Ховд аймгийн төвөөс 300 орчим км зайд оршдог.
