Дарьгангын алдарт дархчуулын нэг Шаравын Дондовын бүтээл “Кодтой цоож” бол Сүхбаатар аймгийн Угсаатны зүйн музейд хадгалагдаж буй ховор бөгөөд өвөрмөц үзмэрүүдийн нэг. Учир нь уг цоож нутгийн нэрсээр цоожлогдож, бас онгойдог юм. Өөрөөр хэлбэл цоожин дээрх тоо, үсгүүдээр түлхүүр үгийг бүтээж цоожилж, бас онгойлгодог нь бүтээлийн гол онцлог.
Монголын анхны кодтой цоож гэгддэг уг цоож нь “Сүхбаатар” гэдэг үг үүсгэн ард нь арвын тоо гаргахаар онгойдог бол “Дарьганга” гэдэг үг үүсгээд ард нь мөн арвын тоо гаргахаар цоожлогддог байна.
Алдарт дархан үүнийгээ Сүхбаатар аймгийг сурталчлах “Соёл урлагийн 10 хоног”-т зориулсан бөгөөд 1963-1964 оны хооронд бүтээсэн гэж үздэг. Цоожны их биеийг гуулиар хийж, нүүрэн хэсгийг монгол хээгээр чимэглэжээ. Тэрбээр уг бүтээлээ ердөө арав хоногт хийсэн байна.
