Сонгодог урлагт дурлагсдад дуулгах таатай мэдээ байна. “Монголын балетын хөгжил сан” энэ удаа “Мodern of Night” тоглолтоо ирэх долдугаар сарын 4-ний өдөр хийхээр төлөвлөжээ. Тэд “Мodern of Night” тоглолтоороо сонгодог бүжгийн урсгал XXI зуунд олон улсад хэрхэн эрчимтэй хөгжиж байгааг үзэгчиддээ хүргэх бөгөөд оюун санаа, сэтгэхүйн ертөнцөө үйл хөдлөлөөрөө харуулах, биеийнхээ бүхий л эд, эсийг амилуулж чадах бүжигчид, тэднээс гарах асар их эрч хүч, оргилсон энерги, хүний дотор орших нигүүлсэнгүй сэтгэл, уучлалыг мэдрүүлэх нь ээ.
АНУ-ын Ерөнхийлөгчийн Цагаан ордон, Лондон хотын Роял Балет, ОХУ-ын Болшой театр, Италийн Ла Скала зэрэг дэлхийн сор театруудын тайзнаа хүндэтгэлтэйгээр уригдан бүжих балетын урлагийн шилдгүүдийн тоглолтыг Монголдоо үзэх боломжтой боллоо.
АНУ-ын Бостон хотоос Монгол Улсыг зорьж ирэх бүжигчдийн ур чадварыг харуулах “Мodern of Night”тоглолт ганцхан удаа болно.
Энэхүү тоглолтыг алдарт “Бостон балет”-ын гоцлооч, Гавьяат жүжигчин Д.Алтанхуяг Улаанбаатарын болон хөдөө орон нутгийн үзэгчиддээ хүргэх хүсэлтэй байгаа гэнэ.
Сонирхуулахад, “Монголын балетын хөгжил сан” нь 2011 онд “Мodern of Night” Олон улсын балетын фестивалийг анх удаа эх орондоо зохион байгуулсан юм. Ингэснээр Монголын сонгодог урлаг, тэр дундаа балетын урлагийн хөгжлийг нэгэн шинэ шатанд гаргаж чадсан. Өнгөрсөн гурван жилийн хугацаанд тус сан нийт таван удаагийн олон улсын чанартай балетын тоглолтыг Монголын үзэгчиддээ хүргэн, дэлхий дахины балетын хөгжлийн чиг хандлага, олон улсын бүжигчдийн ур чадварыг Улаанбаатарчууддаа танилцуулсан юм.
www.URLAG,mn
