Хөзөр дөнгөж сурч эхэлж байгаа хүнд хамгийн сайн моднууд очдог. Ер нь аливаа юмыг эхлүүлж байгаа хүн бүхэнд хаанаас унаад ирсэн хишиг вэ гэлтэй гэнэтийн аз тохиох нь элбэг. Энэ бол хөлд орж байгаа хүүхдийн эхний алхмуудад эцэг эх нь гараас нь хөтөлж дэмнэдэг шиг, биднийг өмнөх замаараа олон удаа гишгэхэд маань урам өгөхөөр амьдралаас өгдөг бэлэг юм.
Хэсэг замыг туулсаны дараа л бидэнд жинхэнэ чадвар суулгахын тулд тэр замыг сонгосон хүн бүхний давж гарах ёстой бэрхшээлүүдтэй нүүр тулуулдаг. Энэ л үед бүх зүйл эхэн үеийн сохор аз шиг амархан бүтнэ хэмээн эндүүрч байсан хүмүүс замын голоос буцдаг. Бууж өгөх хэзээд л хамгийн хялбар сонголт байдаг даа? Тиймээс л саад бартааг давахаас халширдаг сул дорой хүмүүс гарааны цэгээс нэг их холдож чаддаггүй. Хамгийн ховор эрдэнэс далайн хамгийн гүнд нуугдаж, хамгийн сайхан хэсэг эх газрын нөгөө хязгаарт байдаг. Тэр эрдэнэсийг олж, тэр хэсэгт очсон хүмүүсийн ч гэсэн замд чамд тулгарсан шиг бэрхшээл таарч байсан. Хэн ч тэнд чинийхээс илүү дөт аргаар очоогүй. Учир нь амар хялбар зам ихэвчлэн хүнийг төөрүүлдэг бөгөөд, хөлөө өвдөж байсан ч замдаа таарсан жам ёсны даваануудын ард гарсан хүмүүс л очих ёстой газартаа хүрдэг.
Компьютер тоглоомонд level ахих тусам бид илүү олон саадыг давах хэрэгтэй болдог. Тэгээд тэднийг давсны шагнал болгож бонус оноо, нэмэлт амь өгдөг. Хэд хэдэн level ахисаны дараа бид өөрсдөө ч мэдэлгүйгээр ямар ч саадыг давах арга чадварыг эзэмшчихсэн байдаг. Амьдралын саад тотгорууд ч бас үүнтэй адилхан. Бэрхшээл бүхэн чамайг сайжруулахын тулд, өмнөхөөс чинь илүү дээр газраар алхуулахын тулд хөл дор чинь хөндөлсөж байдаг. Аз ч, бэрхшээл ч чамд зориулагдаж ирсэн бэлэг.
Ирэх долоо хоногт тулгарах бэрхшээл бүхэн бэлэг гэдэгт итгээрэй.
