5000 орчим хүн нэгэн зэрэг иогийн дасгалыг сонирхолтойгоор хийх боломжийг бүрдүүлдэг Иогийн фестиваль ирэх тавдугаар сарын 16, 17-нд “BlueSky hotel & tower”-т зургаа дахь удаагаа болох гэж байна. Хоёр өдрийн турш Монголын болон гадаадын шилдэг багш нар 30 гаруй төрлийн иог, бясалгалын хичээл орно. Жилд ганцхан удаа зохион байгуулагддаг Монголын иогийн фестивалд дэлхийн иогийн алдартай одод, шилдэг багш нар оролцох юм.
Тодорхой дурдвал, Энэтхэг улсын AUYSH яамны харьяа Мораржи Дисай сургуулийн зочин багш нар, орчин үеийн Аштанга иогийн нэрт багш К.Патхаби Жойсын дэг сургалтаар түүний охин Сарасвати Жойс болон түүний зээ хүү Шарат Жойс нараар заалгаж суралцсан, олон улсад сургалт явуулсан туршлагатай Польш улсын иргэн Бянька Олвейра, Монгол Улсын Гавьяат багш, доктор профессор Г.Лхагваа, гавж Д.Нямсамбуу зэрэг мэдлэг туршлагатай багш нар урилгаар оролцож, Монголын иогийн шилдэг багш нар оролцож шинэ хичээл заана.
Мөн фестивалын үеэр иог бясалгал, эрүүл мэндтэй холбоотой ном, бүтээгдэхүүний худалдаа, үйлчилгээ ажиллах аж.
