Болгар улсын Софи хотноо зохион байгуулагддаг эмэгтэй найруулагч, зохиолч, уран бүтээлчдийн өрсөлддөг “Алтан Феми” Олон улсын кино наадамд Монгол Улсаас нийт найман кино бүтээл оролцож, олон төрөлд нэр дэвшиж, нэр хүндтэй шагнал хүртсэн амжилтыг үзүүллээ.
Наадмын зохион байгуулагчдын зүгээс Монгол кино уран бүтээлийг өндрөөр үнэлж, “Монгол кино бүтээлүүд нь гүн гүнзгий агуулгатай, хүн төрөлхтний нийтлэг сэдвүүдийг хөндөн, үзэгч бүрийн сэтгэлд хүрэхүйц санааг илэрхийлсэн уран бүтээлүүд байлаа” хэмээн онцлон дурдсан юм.
Кино наадмын сонгон шалгаруулалтад 130 орны 9600 кино бүтээл оролцсоноос Монгол Улсаас найруулагч Э.Ган-Очирын “Их говийн манаач”, найруулагч Г.Бямбасүрэнгийн “Хувь заяа”, найруулагч Т.Алтантуяагийн “Хөх тавилан”, найруулагч Д.Галбаярын “Эмэгтэйн кэйс” бүтээлүүд шагнал хүртэхээр болсон бол найруулагч Ц.Дэнсмаагийн “Би ганцаараа биш”, найруулагч” О.Урантуяагийн “Явуулын хүн говьд”, найруулагч Б.Отгонзоригийн “Эмэгтэй”, найруулагч Д.Болорцэцэгийн “Гурван эрдэнийн эрэлд” уран бүтээлүүд амжилттай нэр дэвшсэн байна.
Шагнал гардуулах ёслолын ажиллагаа зургаадугаар сарын 6-ны өдөр зохион байгуулагдахаар товлогдоод байна.
