Хөдөлмөрийн баатар, Ардын уран зохиолч Б.Лхагвасүрэнгийн “Дутуу хээтэй тооно” зохиолоос сэдэвлэсэн “Задлаагүй захиа” уран сайхны кино нь “Аранжин” пикчерсийн ээлжит бүтээл бөгөөд ерөнхий найруулагч Б.Батдэлгэр, продюсер, дууны найруулагч Л.Цэрэнтогтох, зургийн найруулагч Г.Гүенбаатар нарын хамтын уран бүтээл юм.
Энэхүү уран бүтээл АНУ-ын Калифорниа мужид зохион байгуулагддаг “California Indie Film Festival”-ийн гуравдугаар сарын шилдгүүдийг тодруулахад шилдэг кино (Best Feature Film) төрөлд тэргүүн байр эзэлж, ялагч боллоо.
Энэхүү бүтээл нь хүний амьдралын эргэлт, харилцаа болон сэтгэл зүйн гүн гүнзгий утга агуулгыг харуулснаараа олон улсын шүүгчдийн анхаарлыг татаж, ийнхүү өндөр үнэлгээ авсан байна.
Бие даасан (Indie) кино бүтээгчдийн чансааг шалгадаг тус наадамд дэлхийн олон орны бүтээлүүд өрсөлдсөнөөс “Задлаагүй захиа” ийнхүү шалгарчээ.
