“Харри Поттер”-ын телевизийн цувралын хоёрдугаар бүлгийг үргэлжлүүлэхээр шийдвэрлэж, зураг авалтыг энэ намар эхлүүлэхээр болсныг HBO компани албан ёсоор зарлажээ.
Тус сувгаас хоёрдугаар бүлгийн нэрийг хараахан зарлаагүй байгаа хэдий ч Ж.К.Роулингийн алдарт зохиолын хоёр дахь боть болох “Харри Поттер ба Нууцат өрөө” номоос сэдэвлэн бүтээнэ гэж таамаглаж байна.
Цувралын эхний бүлэг буюу “Харри Поттер ба Философийн чулуу” кино энэ оны Зул сарын баяраар HBO Max сувгаар үзэгчдийн хүртээл болох юм.
HBO компани өмнө нь Роулингийн долоон боть ном тус бүрийг нэг бүлэгт багтаан, нийт арван жилийн хугацаанд дэлгэцийн бүтээл болгох төлөвлөж байгаагаа зарласан билээ.
Гол дүрүүд болох Харри Поттерт Доминик Маклафлин, Гермиона Грейнжерт Арабелла Стэнтон, Рон Уизлид Аластер Стаут нар сонгогдсон юм. Тэднийг 30 мянга гаруй хүүхэд оролцсон нээлттэй сонгон шалгаруулалтаас шалгаруулжээ.
Харин Харригийн гол дайсан болох Волдемортын дүрд тоглох жүжигчний нэр одоогоор тодорхойгүй байна. Гэхдээ уг дүрд “Оскар”-ын шагналт жүжигчин Киллиан Мерфи болон Энди Серкис нарын нэрс яригдаж байгаа аж.
Хоёрдугаар бүлгийн нээлтийн тов хараахан гараагүй байна. “Нууцат өрөө” бүлэгт Харри болон түүний найзууд Хогвартс дахь сургуулийнхаа хоёр дахь жилд илүү аюултай амьтад, хуучны дайснуудтай нүүр тулж, шидтэнүүдийн ертөнцийн харанхуй нууцуудтай тулгардаг билээ.
