Жүжигчин Кан Сун Ён дахин гэрлэснээ албан ёсоор мэдэгдлээ. Тэрбээр тавдугаар сарын 11-нд өөрийн сошиал хуудсандаа шинэ нөхөртэйгөө хамт авахуулсан зургаа нийтэлж, баярт мэдээгээ фэнүүдтэйгээ хуваалцсан байна. Мөн тэрбээр нөхөртөө зориулан сэтгэл хөдөлгөм үг бичиж, түүндээ гүн талархал илэрхийлжээ. Тэрбээр “Чи надад дахин амьдрах хүч өгсөн. Чамтай хамт байгаа бүх зүйл гайхамшиг шиг санагддаг. Гүн итгэл, амар амгалантайгаар хамтдаа амьдарцгаая” гэжээ.
Түүний агентлаг “Dear ENT”-ийн мэдээлснээр, Кан Сун Ёны шинэ нөхөр эмч мэргэжилтэй аж. Тэд одоо жүжигчин бүсгүйн хоёр хүүг хамтдаа өсгөж байна.
Кан Сун Ён нь 1996 оноос хойш энтертайнмент салбарт ажиллаж буй туршлагатай уран бүтээлч юм. Тэрбээр “King and the Clown” киноны дүрээрээ болон 2001 оны хит баллад дуу “Late Regrets”-ээрээ олон нийтэд анх танигдаж байв. Жүжигчин бүсгүй өмнө нь жазз төгөлдөр хуурч Ким Га Онтой гэрлэж байсан бөгөөд тэд 2023 онд салсан юм.
