МУГЖ Н.Батцэцэг, найруулагч О.Машбат нар АНУ-д кино найруулагчийн мэргэжил эзэмшсэн хүү М.Ивээлийнхээ хамт уран сайхны кино бүтээж, үзэгчдийн хүртээл болоход бэлэн болоод байна. “Цэн тогоруу” нэртэй энэхүү кино ирэх 9-р сарын 12-нд нээлтээ хийхээр товоо зарлалаа.
Уг киноны зохиолыг О.Машбатын хоёр хүү М.Бишрэл , М.Ивээл нар бичжээ. Тэд америкт киноны найруулагч мэргэжил эзэмшсэн бөгөөд тэндээ хэд хэдэн богино хэмжээний кинон дээр ажиллаж байсан туршлагатай аж.
Найруулагч М.Ивээлийг кино уран бүтээлчдийн дунд өссөн гэж болно. Тэрээр багадаа "Зүүдэнд ирсэн хонгорхон ижий", "Цагаан сүүний домог", "Вансэмбэрүү" зэрэг кинонуудын гол дүрд тоглож байсан юм. "Цэн тогоруу" киноны ерөнхий оператор Э.Түмэннасан бол манайдаа л чансаатайд тооцогддог цөөн хэдэн зураглаачдын нэг. Тэрээр "Хувь тавилангийн ээдрээ" тэргүүтэй олон киноны ерөнхий зураглаачаар ажиллажээ.
Киноны гол дүрүүдэд Э.Идэрболд, Б.Оюун-Эрдэнэ,АЖ Д.Мэндбаяр, МУГЖ Б.Магсаржав нар тоглосон байна. Киноны ерөнхий продюсераар МУГЖ Н.Батцэцэг ажилласан бөгөөд харин зургийн даргаар нь "Үхэж үл болно Чингис хаан" гэх мэт дэлгэцийн томоохон бүтээлүүдэд зургийн дарга хийсэн Н.Батбилэг , дууны найруулагчаар М.Болд буюу рок попынхны нэрлэдэгээр "Томоо".нар ажиллажээ. "Цэн тогоруу" кино нэгэн шинэ дуутай болсон бөгөөд үгийг Төрийн соёрхолт яруу найрагч Ц.Бавуудорж бичсэн юм. Харин аяыг нь Олон улсын хөгжмийн зохиолчдын шагналт Ш.Өлзийбаяр зохиожээ.
Дэлгэцнээ, хурц сонин үйл явдлуудаар холбогдсон сэтгэл хөдлөм хайрын түүхийг үзүүлэхдээ жинхэнэ монгол ахуйг сонгон, зураг авалтаа зуун хувь гар дээрээс авсан байна. Ингэхдээ залуусын халуухан сексийн хэсгийг ч залуу найруулагч маань анхны кинондоо багтаажээ. Ямартай ч "Жинжиймаа" киноны баг энэ удаад агуу хайрын их хүч, итгэл найдвар, ухаарал эгээрэл, харамсал энэрэлийг үзэгчдэд бэлэглэх нээ.
www.URLAG.mn
