Кино зохиолч, сэтгүүлч Д.Төрмөнхийн санаачилсан "Цонхон дээр суусан ялаа" цомгийн ажил 2013 оны аравдугаар сараас эхлэсэн билээ. Тэгвэл тус цомгийн ажил саяхан дуусч шинэхэн цомгоо уран бүтээлчид нь өлгийдөн авсан байна. Тэд цомгийнхоо нээлтэд зориулан амьд тоглолтыг зохион байгуулахаар товоо зарлалаа.
"Цонхон дээр суусан ялаа" цомгийн нээлтийн тоглолт энэ сарын 9-нд 19.00 цагт Үндэсний соёл амралтын хүрээлэнгийн “Хар сувд” хөлөг дээр болох юм. Тоглолтонд ирснээр шинэхэн цомгийн дуунуудыг амьдаар сонсох төдийгүй ирсэн зочид "Цонхон дээр суусан ялаа" цомгийг гардан авах нь ээ.
Уг шинэхэн цомгийн санаа болон шүлгийг сэтгүүлч, кино зохиолч Д.Төрмөнх бичиж цомгийн хөгжмийг “А Sound”-ын дуучин Ц.Тэмүүлэн, “Нисванис” хамтлагийн соло гитар Хосоо, “UFO”-ын басс гитар Ариунболд, бөмбөрчин Тулгаа, клавш Анхжаргал нар хамтран зохиосон байна.
Дашрамд дуулгахад, энэхүү цомог маш өндөр өртгөөр бүтсэн бөгөөд хамгийн сүүлчийн мастеринг, миксингийг АНУ-ын “Revolver recording” студид захиалан хийлгэжээ. “Revolver recording” нь Лос Анжелес хотод 30 гаруй жил мэргэжлийн түвшинд үйл ажиллагаа явуулсаар ирсэн нэр хүндтэй студи гэнэ. Студийн хамт олон “Цонхон дээр суусан ялаа” цомгийн өмнө Британийн “Смоуки” хамтлагийн мастеринг хийжээ.
Мөн “Цонхон дээр суусан ялаа” цомог iTunes-ээр дэлхийд нээлтээ хийгээд байгаагаас гадна дуучин Ц.Тэмүүлэн цомгийн эхний уран бүтээл болох “Анидча” дууны клипийг дэлгэсэн юм.
"Цонхон дээр суусан ялаа" цомгийн нээлтийн амьд тоглолтын тасалбар 25 мянган төгрөг бөгөөд хүний тоо заасан гэсэн шүү.
www.URLAG.mn
