Өөрийн авьяас, ур чадвараараа үзэгчдийн сэтгэлийг хөдөлгөхийн зэрэгцээ өхөөрдөм, энхрий байдлаараа хайрыг хамгийн их татдаг жүжигчин бол Т.Энэрэл. Өнөөдөр түүний төрсөн өдөр тохиож байна.
Жүжигчин Т.Энэрэл СУИС-ийг 2010 онд төгссөнөөсөө хойш Төв аймгийн “Монгол туургатан” театраар овоглосон. Ингэхдээ театрын анхны дүрээрээ буюу “Миний чин зоригт бяцхан найз” хүүхдийн жүжгийнхээ дүрээр “Гэгээн Муза” олон улсын театрын наадмын шилдгээр тодорч байлаа. Б.Дашдаваа агсны ач охин тэрбээр оюутан ахуйдаа “Амилсан хайр”, “Хайрын бэлэг” гэхчилэн дэлгэцийн уран бүтээлд тоглож, үргэлжлүүлэн МҮОНТ-ийн “Амьдрал чиний төлөө”, “Боловсрол” телевизийн “Гурван найз”, “Хайр эргэсэн хавар” олон ангит, мөн “Админ Зэт”, “Эцсийн зогсоол Э цэг”, “Алтан судал”, “Seasons of love” кинонд ажилласан бол хамгийн сүүлд “Сүрэг”, “Шар гэгээ”, “Танихгүй ах”, “Бидний мэдэх диваажин”, “Эрдэнэсийн арал” уран сайхны киноны гол дүрийг амилуулсан юм. Харин театрын тайзнаа тэрбээр өнгөрсөн арваннэгдүгээр сард “Pro” театрын бүтээл, Виктор Хюгогийн “Инээмтгий хүн” визуал драмын жүжгийн гол дүр Дея, Александр Дюмагийн “Шадар гурван цэрэг” физикл драмын жүжгийн Констанция Бонасьегийн дүрээр үзэгчидтэй дахин “уулзаад” буй. Хамгийн сүүлд Т.Энэрэл Александр Володины “Таван үдэш” жүжгийн зохиолоос сэдэвлэсэн “Намайг дагуулаад яваач” драмын жүжгийн дүрээр тайзнаа гарсан юм.
Өхөөрдөм, хайр татам Т.Энэрэлд төрсөн өдрийн мэнд хүргэе.
