АНУ-ын сүлжээний аюулгүй байдлын мэргэжилтнүүд 1.2 сая интернэт хэрэглэгчийн нэр болон нууц үгийг хулгайлсан Оросын бүлэг хакерчийг Монгол, Казахстаны хил дээр амьдардаг болохыг тогтоожээ. Саяхан АНУ-ын мэргэжилтнүүд сая гаруй интернэт хэрэглэгчийн нэр болон нууц үгийг хакерчдын бүлэг хулгайлсан болохыг зарлаж байсан бөгөөд эдгээр хакерчийг Оросынх, тэр дундаа Оросын хамгийн шилдэг хакерчид гэж мэдэгдэв.
Мэргэжилтнүүдийн хэлснээр, дээрх бүлэг 10 орчим хүний бүрэлдэхүүнтэй, 20-30 насны, бие биенийгээ мэддэг бөгөөд Монгол, Казахстаны хилийн ойролцоо хаа нэгтээ жижиг хотод амьдардаг гэнэ. Иймэрхүү бүлэг зохион байгуулалтайгаар мэдээлэл олж аван түүнийгээ худалдан борлуулж томоохон хэмжээний ашиг олдог байна. Харин дээрх бүлэг 420 мянган сайтаас хувийн мэдээлэл хулгайлсан бөгөөд мэдээллийн хамгийн том хулгайн хэрэгт холбогдоод байна. Тиймээс уг бүлгийг барих нь нэн тэргүүний ажил болоод байна. Нөгөөтэйгүүр АНУ-ын мэргэжилтнүүд цахим халдлагад өртсөн хүмүүс, компани, орныг нэрлэхгүй хүсэхгүй байна. Ямартай ч, үндэстэн дамнасан зарим томоохон компани дээрх халдлагын золиос болсон нь тодорхой байна.
Э.ТӨГЖАРГАЛ
