Биеийг нь үнэлүүлэх зорилгоор хүмүүсийг тээвэрлэсэн хэргээр ял шийтгүүлээд байгаа Америкийн рэп дуучин P.Diddy (Шон Комбс)-д холбогдох бэлгийн хүчирхийллийн шинэ хэргийг Лос-Анжелес хотын прокурорын байгууллага шалгаж эхэлсэн тухай “NBC News” суваг мэдээлжээ.
Уг хэрэг нь 2020, 2021 онуудад нэгэн эрэгтэйд бэлгийн хүчирхийлэл үйлдсэн байж болзошгүй гэх хэрэг бөгөөд холбогдох мэдүүлгүүдийг 2025 оны намар Лос-Анжелесын прокурорын газарт хүлээлгэн өгсөн байна.
Дээрх гомдлыг нийтлэлч, хөгжмийн продюсер Жонатан Хэй гаргасан бөгөөд тэрбээр “NBC News” сувагт өөрийн нэрийг нийтлэхийг зөвшөөрчээ.
2025 оны аравдугаар сард Нью-Йорк хотын шүүх P.Diddy-г биеийг нь үнэлүүлэх зорилгоор хүмүүсийг тээвэрлэсэн хэрэгт буруутай гэж үзэн дөрвөн жилээс дээш хугацаагаар хорих ял оноосон юм. Түүний өмгөөлөгчид 14 сар хорих ял оноохыг хүссэн бол прокурорууд 11 жилээс дээш хугацаагаар хорих ял оноохыг шаардаж байв. Мөн оны долдугаар сард тангарагтны шүүгчид түүнийг бүх насаараа хоригдох ял авч болзошгүй байсан бусдыг бэлгийн мөлжлөгт ашиглах зорилгоор гэмт хэргийн бүлэглэл байгуулж, хүн худалдаалсан зэрэг илүү ноцтой гэмт хэргүүдэд буруугүй гэж үзсэн байна.
