-Танай гэр бүлийнхэн АНУ-д багагүй хугацаанд ажиллаж, амьдраад эх орондоо ирсэн. Монголдоо ирээд анхны дэлгэцийн бүтээлээ үзэгчдийн хүртээл болгох гэж байна. Сэтгэгдэл ямар байна?
-Танай сонины уншигчдад энэ сайхан өдрийн мэндийг хүргэе. Тиймээ, бид харийн нутагт багагүй хугацаанд ажиллаж, амьдарч байгаад эх орондоо төвхнөөд удаагүй байна. Гэхдээ манай гэр бүлийнхэн эх орондоо очоод дэлгэцийн бүтээл рүү орно гэж эртнээс төлөвлөж байсан юм.
Энэ дагуу ажил явагдаад дууслаа. Тун удахгүй буюу ирэх сарын 12-нд “Цэн тогоруу” киноныхоо нээлтийг хийж, үзэгчдийн хүртээл болгоход бэлэн болоод байна. Киногоо нээх өдөр ойртох тусам сэтгэл догдолж, бас бага зэрэг эмээж байна шүү. Ямартай ч үзэгчдийн таашаалд нийцсэн, сайн бүтээл болсон гэдэгт эргэлзэхгүй байгаа.
-Киноны зохиолыг танай хүүхдүүд бичсэн гэж байсан. Бас таныг ерөнхий продюссерын үүрэг гүйцэтгэсэн гэж “Цэн тогоруу” фэйж хуудаст бичсэн байна?
-“Цэн тогоруу” киног бүтээхийн тулд бид эхлээд сайн зохиолтой байх шаардлагатай байсан. Тиймээс ч зохиол дээрээ маш удаан сууж, ярилцаж, санал бодлоо хэлж, шүүмжлэхдээ шүүмжилж, урамшуулахдаа урамшуулж байв. Хүүхдүүд маань кино зохиолыг хамтарч бичсэн.
Энэ киноны санаа АНУ-д байхад л яригдаж байсан сэдэв. Учир нь бид эх орноосоо хол олон жил хүний нутагт ажиллаж, амьдарсан. Өнгөрсөн хугацаанд эх орон, элгэн садан, нутаг, ус гэж юу болохыг сэтгэл, зүрхээрээ мэдэрч байлаа. Нутаг, усаа санахын зовлон бэрхшээлийг ч энэ хугацаанд үзэж, туулсан.
Мэдээж АНУ-ыг хөгжлөөр нь Монголтой зүйрлэхийн аргагүй. Дэлхийн тэргүүлэгч их гүрэн. Гэвч бид талын монголд төрж, өссөн монголчууд шүү дээ. АНУ хэчнээн сайхан байлаа гээд эх орныг минь гүйцэхгүй. Өөрөөр хэлбэл, хүнд эх орноос нь илүү үнэ, цэнтэй зүйл байхгүй гэдгийг бид АНУ-д амьдрах хугацаандаа илүү мэдэрсэн.
Тиймээс ч бид монголынхоо аж байдал, нүүдэлчдийн уламжлалт амьдралын хэв маяг, хөдөө нутгийн байгалийн үзэсгэлэн, хөдөөгийн залууст тохиож буй бэрхшээл, тэдний хайр сэтгэл, амьдралын тухай өгүүлсэн кино хийхийг зорьсон хэрэг. Эхний ажил бол зохиол байсан. Зохиол дууссаны дараа уран бүтээлийн багаа бүрдүүлэх нь миний үүрэг болсон. Учир нь би ерөнхий продюссерын үүрэг гүйцэтгэсэн.
Энэ удаад би уран бүтээлийн багаа шинэ, залуу уран бүтээлчдээр бүрдүүлэхийг зорьсон. Тиймээс ч кино группт багтсан нийт уран бүтээлчдийн 80 гаруй хувь нь 25 орчим насны залуус. Киноны гол дүрийг бүтээсэн Э.Идэрболд, Б.Оюун-Эрдэнэ нарын шинэ, залуу жүжигчид тоглосон. Киноны дууг П.Идэржавхлан гэж мөн л залуу дуучин дуулсан.
-“Жинжиймаа” киноны баг үзүүлж байна гэж постерт бичигдсэн байсан. Ерөнхийдөө Н.Батцэцэгийн кино уянгын талдаа байдаг гэж хүмүүс ярих юм билээ?
-Энэ удаагийн уран бүтээл урьд, өмнөх кинонуудаас эрс өөр болсон гэж хэлэх байна. Өмнө нь Машбат зохиолыг нь бичээд, найруулдаг байсан. Харин энэ удаад хөвгүүд маань сурсан, мэдсэн зүйлдээ тулгуурлан хамтран ажиллалаа. Өөрөөр хэлбэл, 25-тнуудын уураг, тархиар бүтсэн киноноос арай өөр салхи сэвэлзэх болов уу гэж бодож байна. Анхнаасаа надад тийм хүлээлт ч байсан. Учир нь кино багийнхны 80 гаруй хувь нь залуус. 25-тнуудаас шинэ салхи сэвэлзэнэ гэдэгт үзэгчид төдийгүй бид ч гэсэн итгэж байгаа.
Х.Жаргал
Эх сурвалж: www.mminfo.mn
