Багадаа гэр бүлийнхээ хамт МҮОНТ-ээр хошин урлагийн үзүүлбэрийг цаг тоолон хүлээж, шимтэн үзэж суухдаа У.Цогтбаяр “Том болоод энэ салбарт ажиллах юм сан” гэж мөрөөдөж эхэлжээ. Ингээд дунд ангид ороод драмын дугуйланд суралцаж, ахлах сургуулиа төгсөх хүртлээ хичээллэсэн байна. Энэ үедээ Дархан хотын “DBS” телевикийн “Санчир гараг” хүүхдийн нэвтрүүлгийг ч хөтөлдөг байжээ. Ямар ч эргэлзээгүйгээр жүжигчний мэргэжил сонгон эзэмшсэн тэрбээр уран бүтээлийн гараагаа кинонд дуу оруулахаас эхэлж, улмаар “Эмоци” продакшн үүсгэн байгуулагдахад анхны бүрэлдэхүүнд нь багтан ажиллаж эхэлсэн аж.
Энэ хугацаанд У.Цогтбаяр “Эмоци” продакшны тайз, дэлгэцийн бүтээлүүдэд тоглосноос гадна “Гурван найз” олон ангит кино, “Зөв алдаа”, “Гурван найз: Яасан байх нь уу”, “Од ба гэгээ”, “Hi, honey”, “Гацуурхан”, “Bad angel”, “Параллель ертөнц”, “Хөдөө наадъя”, “Хар сувдны нууц-2”, “Өндгөн толгойт”, “Шувуун хээр”, “Хэрмэл жүжигчид”, “Улаан Явар”, “Бидний мэдэх диваажин” зэрэг бүрэн хэмжээний уран сайхны киноны гол болон туслах дүрд тогложээ.
Түүнчлэн жүжигчин Г.Лхагвацэрэнтэй хамт “+17” цувралыг олны хүртээл болгосноос гадна жүжигчин Н.Баясаа, С.Батзориг, Г.Лхагвацэрэн, Р.Сүхболд нартай хамтран “Xermel team” байгуулж, 2021 онд “In da house”, 2022 онд “In da house: Come back” адал явдалт, инээдмийн уран сайхны киног үзэгчдэд хүргэж байв. Мөн өнгөрсөн жил “In da house-3: in Korea” киног БНСУ-ын уран бүтээлчидтэй хамтран бүтээснээ толилуулсан.
Хамгийн сүүлд тэрбээр Ц.Балдоржийн зохиол “Хориотой” жүжгээр “Xermel team”-тэйгээ тайзнаа гараад буй.
