Хэнтий аймагт зохион байгуулсан Х.Даваасамбуу агсны нэрэмжит ерөөлч, магтаалчдын улсын X уралдаанд 80 гаруй өв тээгч оролцлоо.
Тус уралдааныг энэ сарын 24-25-ны өдөр зохион байгуулж, Өмнөговь аймгийн ерөөлч, магтаалчдаас 46-гаас дээш насны ерөөлийн төрөлд Даланзадгад сумын МУСТА, ерөөлч, магтаалч Ж.Дагвасамба тэргүүн байр, Баяндалай сумын ерөөлч С.Давхарбаяр тусгай байрт шалгарсан байна.
Харин 18-45 насны ангилалд Ноён сумын ерөөлч Г.Батзориг дэд байрт, магтаалын төрөлд Ханбогд сумын магтаалч О.Төрболд дэд байр эзэлсэн бол түүний дүү О.Төрмандах тусгай байр эзэлжээ.
Өсвөр үеийн 13-17 насны ерөөлийн ангилалд Манлай сумын харьяат, Даланзадгад сумын Ерөнхий боловсролын IV сургуулийн сурагч Б.Энхбаатар дэд байр, магтаалын төрөлд Ханхонгор сумын сурагч О.Азбаяр гуравдугаар байр, 6-12 насны ерөөлийн төрөлд Цогтцэций сумын зургаан настай Э.Тэмүүлэн тусгай байрт оржээ.
Өмнөговь аймгийн багийг Монгол Улсын тэргүүн зэргийн ерөөлч С.Мөнхжаргал удирдан бэлтгэж, уралдааны хугацаанд хариуцан ажилласан байна.
Ийнхүү Өмнөговь аймгийн ерөөлч, магтаалчид улсын хэмжээний томоохон уралдаанд амжилттай оролцож, өв соёлыг өвлөн уламжлагчдын эгнээг шинэ үеийн төлөөллөөр баяжуулж байгаа нь нэг тэргүүн, гурван дэд байр, нэг гуравдугаар байр болон дөрвөн тусгай байрын шагналыг хүртэж байгаагаас харж болохоор байгааг зохион байгуулагчид онцлов.
