Г.Занабазарын нэрэмжит Дүрслэх урлагийн музейгээс “Уламжлалт болон орчин үеийн танка, шүтээн зургийн хадгалалт, хамгаалалт, сэргээн засварлалт” сэдэвт сургалтыг Улиастайд зохион байгууллаа.
Энэ сарын 14-15-ны өдрүүдэд зохион байгуулсан сургалтыг тус музейгээс гадаад хамтын ажиллагаа, эрдэм шинжилгээ, судалгааны ажлын хүрээнд “Treasure Caretaking Training” олон улсын байгууллагатай хамтран хэрэгжүүлж буй төслийн хүрээнд зохион байгуулсан байна.
Сургалтад Завхан, Ховд, Увс аймгийн төв болон алслагдсан сумдын музей, соёлын төв, орон нутаг судлах танхимуудын 40 орчим мэргэжилтэн, ажилтан, албан хаагч хамрагдлаа.
Сургалтаар, сүм, хийдийн гадаад, дотоод орчны нөхцөл байдалд үнэлгээ хийх, тэнд хадгалагдаж буй танка, шүтээн зураг болон бусад үнэт дурсгалт зүйлсийн эрсдэлийг гар доорх энгийн хэрэгсэл ашиглан өртөг багатайгаар тодорхойлох, хамгаалах арга барилыг онол, дадлагыг хослуулан заасан байна.
Мөн дадлагын хичээлийг Завхан аймгийн Төгс буянт Жавхлант хийдийн бодит нөхцөлд тулгуурлан зохион байгуулж, оролцогчид соёлын өвийн хадгалалт, хамгаалалтын арга зүйтэй газар дээр нь танилцсанаараа онцлог болсон тухай зохион байгуулагчид мэдээллээ.
