Монгол Улс, Бельгийн Хаант Улсын хооронд дипломат харилцаа тогтоосны 55 жилийн ойн хүрээнд “Нүүдэлчин” соёлын наадам Брюссель хотноо болж өндөрлөлөө.
Соёл, спорт, аялал жуулчлал, залуучуудын яам болон холбогдох байгууллагууд хамтран зохион байгуулсан тус наадам нь үндэсний өв соёл, ахуйг гадаадын иргэдэд сурталчлах, хилийн чанадад оршин суугаа монголчууддаа эх хэл, соёлоо өвлүүлэх зорилготой юм.
Наадмын үеэр уламжлалт урлаг, спортын арга хэмжээ зохион байгуулж, салбартаа манлайлсан иргэдэд төрийн шагнал гардуулахын зэрэгцээ гадаадад өсөж буй хүүхэд багачуудыг эх хэл, соёлын хоцрогдлоос сэргийлэх зорилгоор тусгай асар нээж, хилийн чанад дахь монгол хэл, соёлын төвүүдэд гарын авлага, сургалтын хэрэглэгдэхүүн, уламжлалт тоглоом наадгай гардуулан сургалтын бааз бүрдүүлэхэд дэмжлэг үзүүллээ.
Дэлхийн өнцөг булан бүрд ажиллаж, амьдарч буй элэг нэгт монголчууддаа эх хэл, үндэсний өв соёл, үнэт зүйлсээ эрхэмлэн дээдэлж, хойч үедээ өвлүүлэн үлдээхийг уриалж байна.
