Шведийн алдарт поп хамтлаг “Roxette” Хойд Америкт хийхээр төлөвлөсөн 40 жилийн ойн аялан тоглолтоо цуцалснаа мэдэгдлээ. Тоглолтыг зохион байгуулагч “Live Nation” компани логистикийн хүндрэл болон аялан тоглолтын зардал эрс өссөнтэй холбоотойгоор ийм шийдвэр гаргасан байна.
Хамтлагийн албан ёсны мэдэгдэлд “Логистикийн хүндрэл болон аялан тоглолтын зардал асар их нэмэгдсэнтэй холбоотойгоор “Live Nation”-оос Хойд Америкийн аялан тоглолтыг хойшлуулахаар шийдвэрлэлээ. Ирээдүйд та бүхэнтэйгээ дахин уулзана гэж найдаж байна” гэжээ.
“Roxette” хамтлагийн үүсгэн байгуулагч Пер Гессле энэхүү шийдвэрт харамсаж байгаагаа илэрхийлээд “Лена, хамтлагийнхан бид бүгд маш их сэтгэл дундуур байна. Бид энэ аялан тоглолтыг үнэхээр тэсэн ядан хүлээж байсан. АНУ бол бидний хамгийн том стриминг зах зээл. Энэ шийдвэрийг “Live Nation” өөрсдийн тооцоололд үндэслэн гаргасан байх” хэмээжээ.
Хойд Америкийн тоглолтууд есдүгээр сарын 10-нд Мичиган мужид эхэлж, аравдугаар сарын 9-нд Вашингтон мужид өндөрлөхөөр төлөвлөгдөж байсан бөгөөд Ник Лоу, Тейлор Дэйн нар мөн оролцох байв. Зарагдсан бүх тасалбарын мөнгийг автоматаар буцаан олгох аж.
Энэхүү мэдэгдэл нь “Roxette”-ийн 1990 оны хит дуу “It Must Have Been Love” дуу YouTube-д 1 тэрбум үзэлт давсан баярт мэдээний дараахан гарсан байна. Харин хамтлагийн Европ дахь 40 жилийн ойн аялан тоглолт төлөвлөгөөний дагуу үргэлжлэх аж.
