Поп од Чарли XCX-ийн хөргийг Их Британийн Үндэсний хөрөг зургийн галерей (National Portrait Gallery) албан ёсоор цуглуулгандаа нэмжээ. Энэхүү үйл явдал нь түүний “Music, Fashion, Film” нэртэй шинэ цомог Их Британийн чартад нэгдүгээрт бичигдэхээр өрсөлдөж буй долоо хоногтой давхцаж байна.
Гэрэл зурагчин Харли Вэйр 2023 онд уг хөргийг авчээ. Энэ зураг нь Чарлигийн 2024 онд гаргасан, поп соёлын үзэгдэл болсон “Brat” цомгийн үеийг илэрхийлсэн зураг юм.
Үндэсний хөрөг зургийн галерейн гэрэл зургийн ахлах куратор Брандей Эстес “Чарли бол өөрийн үеийн соёлын хамгийн тодорхойлогч дүрүүдийн нэг. Харли Вэйр дотно мэдрэмжийг хүчирхэг оршихуйтай хослуулсан өвөрмөц гэрэл зургийн хэлбэрийг хөгжүүлсэн” гэж онцолжээ.
Энэхүү хөргийг Лондон дахь галерейн “History Makers Now” үзэсгэлэнгийн хэсэгт дэлгэн үзүүлж байгаа бөгөөд “Bukhman Foundation”-ы санхүүжилтээр худалдан авсан байна.
Ташрамд дурдахад, “Music, Fashion, Film” шинэ цомог нь шүүмжлэгчид болон сонсогчдоос өндөр үнэлгээ авч, Их Британийн долоо хоногийн дундах чартыг тэргүүлж байна. Амралтын өдрүүдээр Чарли уг цомогт багтаагүй гурван B-side дуугаа iTunes-ээр цацсан бөгөөд эхэндээ стриминг үйлчилгээнд байршуулахыг хүсээгүй ч шүтэн бишрэгчдийнхээ хүсэлтийн дагуу шийдвэрээ өөрчилсөн гэж тайлбарлажээ.
Сүүлийн жилүүдэд Чарли жүжигчний карьераа мөн өргөжүүлж, хэд хэдэн кинонд дүр бүтээсэн бөгөөд удахгүй “I Want Your Sex”, “The Gallerest”, “Faces of Death” зэрэг кинонд тоглох юм. Мөн энэ жил “Reading & Leeds Festival”-ийг тэргүүлэн оролцож, дараа нь Хойд Америкийн аялан тоглолтоо эхлүүлэхээр төлөвлөжээ.
