Монгол Улсын Ардын жүжигчин Э.Амартүвшин Италийн ерөнхийлөгчийн зарлигаар тус улсын төрийн дээд шагналуудын нэгд тооцогддог “Ordine della stella d’Italia” буюу “Оддын одон”-гоор шагнууллаа.
“Ordine della stella d’Italia” буюу “Оддын одон”-г соёл, урлаг, шинжлэх ухаан, эдийн засаг, хүмүүнлэгийн салбарт онцгой хувь нэмэр оруулсан, Итали болон бусад орны найрамдал, хамтын ажиллагааг бэхжүүлсэн хүмүүст олгодог байна.
Э.Амартүвшин 2009-2016 онд Улсын дуурь, бүжгийн эрдмийн театрт дуучнаар ажиллаж байгаад Италид ажиллаж, уран бүтээлээ туурвиж байгаа юм. Тэрбээр дэлхийн сонгодог урлагийн дээжис “Кармен”, “Травиата”, “Риголетто”, “Евгений Онегин”, “Тоска”, “Айда”, “Троваторе” зэрэг алдартай дуурийн гол болон туслах дүрд амжилттай тоглож, дуурийн урлагийн гайхамшгийг Итали, Франц, Герман, Австри, Испани, Орос, Япон, Сингапур, Англи, Бельги, Америк, Унгар, Болгар, Хятад зэрэг дэлхийн олон орны томоохон театрын тайзнаас үзэгч олонд дуурсган толилуулж буй дэлхийн шилдэг баритон юм.
