“Оскар”-ын шагналт жүжигчин, “Thirty Seconds to Mars” хамтлагийн ахлагч Жаред Летог дөрвөн эмэгтэй бэлгийн хүчирхийлэл үйлдсэн хэмээн буруутгажээ. Эдгээр мэдүүлэг нь BBC-ийн шинэ баримтат кинонд гарсан бөгөөд нийт 10 эмэгтэй анх удаа олон нийтэд өөрсдийн түүхийг ярьсан байна.
Нэг эмэгтэй 17 настайд нь Жаред Лето өөрийг нь хүчирхийлсэн гэж мэдүүлсэн бол өөр нэг эмэгтэй мөн 17 настайдаа Лас-Вегас дахь зочид буудлын угаалгын өрөөнд бэлгийн хүчирхийлэлд өртсөн гэсэн байна. Гурав дахь эмэгтэй 19 настайдаа Лондон дахь зочид буудалд Жаред Лето өөрийг нь бэлгийн хүчирхийлэл үйлдэхээр сүрдүүлсэн гэсэн бол дөрөв дэх эмэгтэй 16 настай байхад нь Жаред Лето алдар нэрээ ашиглан удаа дараа бэлгийн агуулгатай утасны дуудлага хийж, улмаар нууцлалын гэрээнд гарын үсэг зурахыг шаардсан гэж мэдүүлжээ.
BBC-ийн мэдээлснээр эдгээр үйл явдал 2002–2016 оны хооронд болсон бөгөөд зарим мэдүүлгийг тухайн үеийн зурвас, гэрэл зураг, гэрчүүдийн мэдүүлгээр хэсэгчлэн баталгаажуулсан гэжээ.
Одоогийн байдлаар Жаред Лето BBC-ийн эл баримтат киноны эсрэг албан ёсоор хариу өгөөгүй байна. Тэрбээр 2025 онд мөн энэ төрлийн асуудалд холбогдож байсан бөгөөд эрс няцааж байсан юм.
