Монгол Улсын Төрийн соёрхолт, Ардын жүжигчин Цэгмидийн Төмөрбаатар 70 нас хүрлээ.
Ардын жүжигчин Цагааны Цэгмидийн хүү тэрбээр 1956 оны энэ өдөр Улаанбаатар хотод мэндэлжээ. Тэрбээр 1978 онд Улсын багшийн дээд сургуулийн кино драмын анги, 1984 онд Москвагийн Кино урлагийн дээд курс, 1986-1988 онд Марксизм-Ленинизмийн оройн дээд сургуулийг жүжигчин, найруулагчийн мэргэжлээр тус тус дүүргэжээ. Сургуулиа төгсөөд 1978-1997 онд Улсын үүхэд залуучуудын театрт жүжигчин, 1999-2000 онд КУДС-д багш, 2000-2002 онд Улсын драмын эрдмийн театрт жүжигчин, 2002 оноос театр, хөгжмийн “Мюзик-Холл” дээд сургууль, 2010 оноос одоог хүртэл “Зохиомж” дээд сургуульд багшаар ажиллаж буй.
Уран бүтээлийн гараагаа 1976 онд “Хүний амь” киноны Эрдэнийн дүрээр эхэлж, үргэлжлүүлэн “Суварган цэнхэр уулс”, “Говь Хянганд тулалдсан нь”, “Нарны унага”, “Ирэх хаврын цэцэг”, “Мандах нарны туяа”, “Амьдралын нахиа”, “Мөнх тэнгэрийн хүчин дор”, “Ээждээ л үнсүүлэхсэн”, “Үхэж үл болно – Чингис хаан”, “Сайн уу, амьдрал минь”, “Боолын гэрээ”, “Долоон бурхан харвадаггүй”, “Сүүлчийн шөнө”, “Миний ах атаман”, “Бүү март”, “Түүх мартахүй” зэрэг 80 шахам уран бүтээлийн гол болон туслах дүрд тогложээ. Түүнчлэн мөн тооны тайзны уран бүтээлд тоглосон байдаг.
Ц.Төмарбаатар 1981 онд “Говь Хянганд тулалдсан нь” кинонд Ю.Цэдэнбалын дүрийг бүтээснийхээ төлөө 25 настайдаа Төрийн шагнал хүртсэн ч 1989 онд Ардчиллын анхдугаар зөвлөгөөн дээр үг хэлэх зөвшөөрөл авч, төрийн шагналаасаа татгалзаж байгаагаа албан ёсоор зарлаж байв. Тэрбээр 2009 онд Монгол улсын Гавьяат жүжигчин цолоор энгэрээ мялааж, 2025 онд Монгол улсын ерөнхийлөгч Ухнаагийн Хүрэлсүхийн зарлигаар Монгол Улсын Ардын жүжигчин цол хүртсэн юм.
