Монгол Улсын Ерөнхийлөгч У.Хүрэлсүх, Монгол Улсын сайд бөгөөд Эдийн засаг, хөгжлийн сайд Ж.Энхбаяр, Соёл, спорт, аялал жуучлал, залуучуудын сайд Ж.Алдаржавхлан, Боловсрол сайд Л.Энх-Амгалан нар Монголын Үндэсний музей, Шинжлэх ухааны академийн Археологийн хүрээлэн, БНСУ-ын Үндэсний музейн хамтран хэрэгжүүлж буй “Мон-Сол” археологийн малтлага судалгааны төслийн үйл ажиллагаатай 2026 оны наймдугаар сарын 21-ний өдөр танилцлаа.
Хэнтий аймгийн Баян-Адрага сумын нутаг Дуурлиг нарс хэмээх газарт орших Хүннүгийн язгууртнуудын дурсгалыг малтан судлах уг төслийг 1997 оноос эхлүүлсэн бөгөөд 29 дэх жилдээ амжилттай үргэлжилж байна.
Дуурлиг нарсны эл дурсгалыг Хүннүгийн бусад 5 дурсгалын хамт энэ оны 07 дугаар сард БНСУ-ын Пусан хотноо болсон ЮНЕСКО-ийн Дэлхийн өвийн хорооны 48 дугаар чуулганаар Дэлхийн өвд бүртгэсэн юм.
Энэхүү дурсгалт газрыг түшиглэн судалгааны төв, Хүннүгийн язгууртны булшны ил музей байгуулах саналыг төсөл хэрэгжүүлэгч байгууллагууд гаргасныг Монголын Улсын Ерөнхийлөгч У.Хүрэлсүх дэмжихээ илэрхийлэн, дагалдаж яваа Засгийн газрын гишүүдэд чиглэл болголоо.
Дуурлиг нарсны Хүннүгийн язгууртнуудын дурсгалын малтлага судалгааны үр дүнгээр өмнө нь хоёр удаа эрдэм шинжилгээний хурал зохион байгуулж, судалгааны бие даасан хоёр бүтээл туурвисан төдийгүй тусгай үзэсгэлэнг дэглэж, олон нийтэд хүргэсэн юм.
Дурсгалт газраас олж илрүүлсэн археологийн олдворуудын заримыг нь Монголын Үндэсний музейн сан хөмрөгт хадгалж байна.
