Төв аймгийн Монгол туургатан театрын дэргэдэх “Гялбаа” бүжгийн студийн “Оддын гялбаа” хамтлаг БНСУ-ын Сөүл хотод болсон “KACIEA” олон улсын бүжгийн уралдаанаас таван шагнал хүртжээ.
Тус хамтлаг үндэсний бүжгийн төрөлд шилдэг цом хүртсэн бол Э.Энхрийлэн үндэсний бүжгийн гоцлол төрөлд алтан цом, Б.Халиун хип хоп бүжгийн гоцлол төрөлд мөнгөн цом хүртжээ. Мөн А.Сондор, Б.Халиун нар үндэсний бүжгийн хослол төрөлд мөнгөн цом хүртэж, багш М.Мөнхдэлгэр шилдэг багш цомын эзэн болсон байна.
Сөүл хотод энэ сарын 5, 6-нд болсон тус уралдааны Монгол дахь урьдчилсан шалгаруулалтад “Оддын гялбаа” хамтлаг оролцож, олон улсын шатанд өрсөлдөх эрх авчээ.
Олон улсын шатанд үндэсний бүжгийн төрөлд Г.Энхтайваны хөгжим, М.Мөнхдэлгэрийн дэглэлт “Торгон торгууд” бүжгээр оролцсон байна. Харин гоцлол төрөлд “Онгодын эгшиг”, хослол төрөлд “Тува” бүжиг, мөн цаатан, хип хоп, к-поп бүжгийн төрлөөр өрсөлджээ.
Багш М.Мөнхдэлгэр хэлэхдээ, хамтлагийн уран бүтээлийн онцлог нь Монголын олон ястны бүжиг, өв соёлыг хөдөлгөөн, дэглэлтээр илэрхийлдэгт оршдог. Үндэсний бүжгийн бүтээлээрээ дамжуулан ястан бүрийн өвөрмөц онцлогийг харуулахыг зорьдог гэв.
