Холливудын продюсер асан Харви Вайнштейн 2006 онд телевизийн продакшны туслах асан Мириам Хэйлид бэлгийн халдсан хэрэгт буруутгагдан, Нью-Йоркийн шүүхээс 15 жилийн хорих ял сонслоо. Шүүхийн шийдвэр есдүгээр сарын 23-нд Манхэттенд гарсан байна.
Хэйли шүүхийн хурлын үеэр хохирогчийн мэдүүлэг өгч, уг хэргийн дараах долоон жилийн хугацаанд өөрт нь тохиолдсон дарамт, доромжлолын талаар ярьжээ. Тэрбээр Вайнштейн, түүний өмгөөлөгчдийн баг болон өөрийн нэр хүндэд халдах зорилгоор мөнгө авсан байж болзошгүй подкаст хөтлөгчдийн үйлдлээс болж олон нийтэд гутаагдсан гэж мэдэгдсэн байна.
Вайнштейн шүүхийн өмнө хийсэн үйлдэлдээ харамсаж байгаагаа илэрхийлсэн ч бэлгийн хүчирхийлэл үйлдсэн гэдгээ хүлээн зөвшөөрөөгүй байна. Түүний өмгөөлөгчид уг шийдвэрийг давж заалдахаар төлөвлөж байгаа аж.
Энэ хэрэг олон жил үргэлжилсэн шүүхийн маргааны дараа ийнхүү шийдэгдэж байна. Вайнштейн 2020 онд Нью-Йоркт бэлгийн хүчирхийлэл болон хүчингийн хэрэгт буруутгагдан 23 жилийн хорих ял авсан боловч 2024 онд Нью-Йоркийн дээд шүүх уг шийдвэрийг хүчингүй болгож, шинэ шүүх хурал явуулах шийдвэр гаргасан юм. Улмаар 2025 онд дахин шүүгдэж, Хэйлитэй холбоотой хэргээр дахин гэм буруутайд тооцогджээ.
Вайнштейнтэй холбоотой бэлгийн хүчирхийллийн олон арван мэдэгдэл 2017 онд олны анхаарлын төвд орж, улмаар Холливудад болон бусад салбарт бэлгийн дарамт, хүчирхийллийн эсрэг #MeToo хөдөлгөөн хүчтэй өрнөхөд нөлөөлсөн юм.
