БНСУ-ын Морин уралдааны агентлаг Хөвсгөл аймагтай адууны соёлын солилцоог хөгжүүлэх чиглэлээр харилцан ойлголцлын санамж бичиг байгууллаа.
Хамтын ажиллагааны хүрээнд Хөвсгөлд адууны соёлын цогцолбор байгуулах, хөгжүүлэхийн зэрэгцээ соёл, аялал жуулчлалын төсөл хэрэгжүүлж, орон нутгийн эдийн засгийн идэвхийг нэмэгдүүлэхээр болжээ. Мөн Ази тивд адууны соёлыг түгээн хөгжүүлэхэд хамтран ажиллана.
Түүнчлэн хүний нөөцийн солилцоог дэмжих зорилгоор морь сургагч, адуу арчилгааны ажилтны мэргэжлийн шалгуурыг шинэчлэх ажлыг хийж байна.
Монгол Улсад албан ёсоор хүлээн зөвшөөрөгдсөн мэргэжлийн ур чадвар, мэдлэгтэй Монголын адуу маллагчдад E-7 виз олгож, БНСУ-д ажиллуулах боломжийг бүрдүүлэхээр ажиллаж байгааг УИХ-ын гишүүн Б.Бат-Эрдэнэ хэллээ.
Тус санамж бичгийг БНСУ-ын Сөүл хотод БНСУ-ын Морин уралдааны агентлагтай УИХ-ын гишүүн Б.Бат-Эрдэнэ, Хөвсгөл аймгийн ИТХ-ын дарга Д.Пүрэвдорж нар байгуулжээ.
Цаашид хоёр тал морьт харваа, морин дээрх бөх зэрэг морин спортын төрлүүдийг нэгдсэн дүрэм, стандарттай болгон хөгжүүлж, олон улсын хэмжээнд өргөжүүлэхээр зорьж байна. Үүнтэй холбоотойгоор БНСУ-ын Морин уралдааны газар (KRA)-ыг төв болгон олон улсын морин спортын хөгжлийг дэмжих урт хугацааны төлөвлөгөө боловсруулж байгаа юм.
