Монгол, Японы хамтарсан “Ирээдүйн төлөө хамтдаа” урлагийн тоглолт Монголын Хүүхдийн ордны Их танхимд энэ сарын 25-нд боллоо.
Уг тоглолтыг Япон Улсын ЭСЯ дэмжлэгтэй Монголын хүүхдийн ордны “Нүүдэл” чуулгын хүүхдүүд монгол үндэсний аялгуу, япон дуу тоглож, дуу, бүжгийн дугуйлангийн хүүхдүүд япончуудтай хамтран япон дуу дуулж, нүсэр бөмбөрийн хэмнэлтэй хослуулан бүжиглэсэн юм.
Японы уламжлалт бөмбөрийн “Hero’s Club” мэргэжлийн хөгжимчдөөс бус, Япон Улсын өнцөг булан бүрээс цугласан жижиг, дунд үйлдвэрийн эзэд, захирлуудаас бүрдсэнээрээ онцлогтой. Хөгжим бол хэлээр өгүүлэх боломжгүй зүйлийг хүний зүрх сэтгэлд хүргэх онцгой хүчтэй тул тэд үндэснийхээ бөмбөрийн урлагаар дамжуулан нийгэмд эерэгээр нөлөөлж, дэлхий дахиныг холбох гүүр болохыг зорьж байна.
Энэхүү тоглолт нь тэдний олон улсын хэмжээнд хэрэгжүүлж буй соёлын томоохон ажлын нэг хэсэг юм. Тэд өмнө нь Японы түүхэн дурсгалт газрууд, АНУ, Канад, Дубайд тоглолтоо олон нийтэд толилуулжээ. Тус клуб нь “Ямато төсөл”-ийн хүрээнд хөдөө аж ахуй, боловсрол, соёл, эдийн засаг гэсэн үндсэн дөрвөн салбарт нийгмийг сэргээх урт хугацааны үйл ажиллагаа хэрэгжүүлдэг байна.
