Монголчууд ганц ширхэг хялгасаар ном бичиж байсан баримт бичиг номын түүхэнд тэмдэглэгдэн үлдснээр барахгүй биет дурсгал нь өнөөг хүртэл байсаар байна. Монголын нэрт эрдэмтэн Б. Шагж 1915 онд “Ногоон дарь эхийн тууж” хэмээх судрыг ийнхүү бүтээжээ.
Гэрийн өрхийг бүтээн харанхуй болгоод үдийн нарны хурц гэрлийг ганц хуруу дарам жижиг цоорхойгоор номынхоо хуудсан дээр тусгаж тэр гэрэлд ганц ширхэг хялгасны үзүүрээр бичсэн тэрхүү бичиг ном одоо Үндэсний төв номын санд хадгалагдаж байгаа билээ. Түүний хэмжээ нь 6.5смХ 6см бөгөөд Монголчуудын бүтээсэн хамгийн жижиг ном юм. Сонирхуулахад, Монголын хамгийн анх уншиж сурсан хүүхэд 2 настай байжээ. Б.Азжаргал гэх хүү 2 настайдаа анх юм уншиж, 3 настайдаа үл мэдэгдэгчтэй тоо бодож сурчээ.
