Цасан дээгүүр би нисэж байна
Манант шөнийн бүрэнхийд
Цав цагаан тал тэртээ доогуур
Алгуурхан урсана
Цайвалзан … дайвалзан
Булш бунхнууд алсарна
Царцуу тос шиг гилгэр тэнгэрээр
Сар гулсаж намайг дагана
Хотын гэгээ угтаж
Зэлүүд талыг орхиход
Хойноос минь хашгичих сүнснүүдийн
Зэрлэг шуугиан намжиж Уйтгартай гэгч нь
Гудамжны дэнлүү асаад
Утаа ханхалж
Улбар тусгал нь манарна
Үүлс тэнгэрийн хаяанаас
Сүглийн тосох нь
Унтаж байгаа хотыг
Надтай хамт залгих мэт
Нэгэн цагт ууж суусан зоогийн газрын үүдэнд
Нээлттэй гэсэн бичиг англиар дурайгаад
Хөөрхий минь миний муу найз
Хүн амьтныг царайчлан … дагаж
Шар айраг шимэн хөлчүү нүдэндээ
Сайхан цагаа дурсаж, нулимстай
Цантаж буй цонхоор
Түүний цаана зогсоо намайг нэвт
Тас харанхуйг ширтэнэ
Яалтай ч билээ
Тэндээс би эргэн нисэж
Тэнгэрээр дэмий эргэлдэнэ
Яалтай ч билээ дээ
Явж байгаа хөлөөр цас хяхтнан
Янаглаж байгаа хоёрын дээр цас будран
Ялгуусан дууллыг шөнийн тэнгэрт хадаан
Ямар сайхан юм бэ, энэ цас
Сүнс миний бутарч нисэх эд эсийн
Сүүмгэр холбоосоор бударч хэсэх цас
Танай цонхонд надтай хамт хайлж
Тахирлан урсаж байна, нулимс шиг
Аяа чи миний номыг бариад
Алчуур нөмөрч, хажуулдан суугаад
Аяархан хуудас хуудсаар нь эргүүлж, нүд чинь
Алгуурханаар мөр мөрөөр доошилно
Чиний өмнө би сөгдөн суугаад
Чичирсэн гараа сунгаж хацрыг чинь илнэ
Амтархал, бахархал, үл тоосон дооглол
Аль нэгийг харцнаас чинь харах гэж зүтгэнэ
Даанч чи минь намайг үл анзаарна
Даашинзны чинь хормой задрахад бие чинь цахилгаан цахих мэт
Цухалзан, цав цагааныг чинь хараад галзуурах мэт
Цухалдан тонгочих сүнс намайг үл харна
Хонх тас хийв. Ховхрон унав чамаас би
Хойш шидчихээд номыг минь
Дагина минь хонгор хайр минь баярлан өндийв
Даанч яав даа хэн бэ энэ чинь?
Булбарай хөлөөрөө намайг нэвт гишгин босоод
Нүцгэн биеэрээ намайг шувт туучин ухасхийж
Энгэрээ товчлон хаалгаа нээж, орж ирсэн
Эр хүнийг чи тэврэн авлаа …
Ахиад л би цас хяхтнахыг сонсож байна
Аниргүй харанхуй гудамжинд танайхаас гараад
Сүнс л мэдрэх нулимсаа тэнгэрт асгаж
Сөөнгө хоолойгоор бархирч явна
Ард минь хотын гэрэл анивчин бүдгэрсээр
Аниргүй хот, булш бунхан тосож авлаа, урдаас минь
www.URLAG.mn
