"Улаанбаатар" олон улсын кино наадмын зохион байгуулагчид энэ жилээс Монголын кино урлагийн зөвлөлтэй хамтран “Монгол кино хөтөлбөр”-ийг зохион байгуулж байгаа билээ. Энэ нь тус наадмын нэгэн онцлог бөгөөд 2013-2014 онд бүтээгдсэн найруулагч И.Нямгаваагийн "Хязгааргүй", залуу найруулагч М.Ивээлийн "Цэн Тогоруу" зэрэг бүтээлийг олон нийтэд үзүүлэхээр болсон юм.
Мөн 2014 онд бүтээгдсэн бөгөөд нээлтээ хийгээгүй кино бүтээлээс сонгон уг наадмын нээлтийн киногоор залуу найруулагч Л.Таванбаярын "Хүдэн" уран сайхны киног сонгогдож, энэ сарын 8-нд “Тэнгис” кино театрт Улаанбаатар олон улсын наадмыг нээн дэлхийн нээлтээ хийх товоо зарлалаа.
“Жаалхүү фильм”, “Хишигтэн” нэгдлийн хамтын бүтээл болох тус кинонд хүмүүний амьдралын цөөхөн ч болов хором мөч бүхэн үнэ цэнэтэй, утга учиртай, дахин хэзээ ч давтагдашгүй бөгөөд гаргасан алдаа эндэгдэл бүхэн тань хэзээ нэгэн цагт эргээд таны амьдралд арилашгүй хар толбо үлдээдэг юм гэсэн санааг өгүүлжээ.