Дархан-Уул аймгийн “Залуучууд” театрын 50 жилийн ой тохиож байна.
Тэртээ 1976 онд БНМАУ-ын Сайд нарын Зөвлөлийн 250 дугаар тогтоолоор үүдээ нээж, Дархан хотын хүн амын насны онцлог, соёл урлагийн хэрэгцээнд тулгуурлан 1978 онд “Залуучуудын театр” хэмээн нэрлэгдсэн цагаас хойш тус театр хагас зуун жилийн баялаг түүхийг бүтээжээ.
Анхны уран бүтээлийнхээ шанг Г.Бат-Очирын “Өргөх цамхгийн дор” жүжгээр татсан эл хамт олон өнөөдөр дэлхийн болон Монголын сонгодог бүтээлүүдээс бүрдсэн 250 гаруй уран бүтээлийн сан хөмрөгтэй, 100 гаруй ажилтан, уран бүтээлчийн бүрэлдэхүүнтэйгээр Дархан хотын иргэд, үзэгч олондоо соёл, урлагийн үйлчилгээг тасралтгүй хүргэж байна.
50 жилийн хугацаанд тус театрын уран бүтээлчид Монгол Улсын 21 аймаг, сум сууринаар аялан тоглосны зэрэгцээ ОХУ, Болгар, Куба, Чехословак, Герман, Солонгос, Хятад, Польш, Финлянд зэрэг олон оронд Монголын үндэсний урлаг, соёлын өв, түүх, уламжлалыг сурталчлан таниулж, эх орныхоо урлагийн нэр хүндийг өргөхөд үнэтэй хувь нэмэр оруулсан бахархам түүхтэй.
Энэхүү 50 жилийн түүх бол зөвхөн нэг театрын ой төдий бус, үе үеийн жүжигчин, найруулагч, уран бүтээлч, инженер техникийн ажилтан, театрын хамт олон, үзэгч олны хамтын хөдөлмөр, авьяас билэг, үнэт өвийн түүх юм.
