Төв аймаг ОХУ-ын Бүгд Найрамдах Буриад Улсын П.И.Чайковскийн нэрэмжит урлагийн коллежтой хамтран “Өнчин цагаан ботго” үлгэрийн хөгжимт жүжиг, “Их хүндэтгэл” уран бүтээлийн тоглолтыг үзэгчдэд хүргэнэ.
“Өнчин цагаан ботго” хөгжимт жүжгийн цомнолыг Соёлын гавьяат зүтгэлтэн, урлаг судлалын ухааны доктор П.Нямлхагва бичиж, найруулгыг Д.Цэрэнчимэд хийж, хөгжмийг Г.Энхтайван зохиожээ.
Мөн Монгол, Буриадын уран бүтээлчид хамтран “Их хүндэтгэл” тоглолтыг бэлтгэж, хоёр талын уран бүтээлийг үзэгчдэд хүргэх юм.
Эдгээр уран бүтээлийг Монгол Улс, ОХУ дипломат харилцаа тогтоосны 105 жилийн ойг угтан хүргэж байгаа бөгөөд цаашид шинэ уран бүтээл туурвих, хамтарсан тоглолт зохион байгуулах чиглэлээр хамтран ажиллахаар болжээ.
Төв аймаг, Буриад Улс худалдаа, эдийн засаг, шинжлэх ухаан, техник, соёл урлагийн салбарт хамтран ажиллаж ирсэн байна. Тухайлбал, Төв аймгийн удирдлагууд Буриад Улсын Засгийн газрын дарга А.С.Цыденовтой хамтын ажиллагааны санамж бичиг, хэлэлцээрт гарын үсэг зурж байсан юм.
Эдгээр хэлэлцээрээр хоёр талын салбар хоорондын харилцааг өргөжүүлэх, хамтын ажиллагааг хөгжүүлэх чиглэлийг тодорхойлсон бөгөөд энэ удаа соёл, урлагийн салбарын хамтын уран бүтээлээр харилцаагаа үргэлжлүүлж байна.
