Өмнөд Солонгосын “Winner” хамтлагийн гишүүн Сон Мин У цэргийн албыг орлон хаах үүргээ удаа дараа зөрчсөн хэргээр нэг жилийн хорих ял авч, уг ялыг хоёр жилийн хугацаагаар тэнсжээ. Сөүл хотын Баруун дүүргийн шүүх аравдугаар сарын 1-нд шийдвэрээ гаргасан байна.
Мин У 2023 оны гуравдугаар сараас 2024 оны арванхоёрдугаар сар хүртэл Сөүлийн баруун хэсэгт нийгмийн үйлчилгээний ажилтан хэлбэрээр алба хаах хугацаандаа нийт 102 өдөр ажилдаа очоогүй гэх хэрэгт буруутгагдсан юм. Шүүх түүнийг Цэргийн албаны тухай хуулийг зөрчсөн гэж үзжээ.
Прокурорууд түүнд 18 сарын хорих ял оноохыг хүссэн боловч шүүх нэг жилийн хорих ялыг хоёр жилээр тэнсэх шийдвэр гаргасан байна. Шүүхээс нийгмийн үйлчилгээний хэлбэрээр алба хааж буй хүмүүс ч цэргийн үүргээ үнэнчээр биелүүлэх ёстойг онцолжээ.
Шүүхийн шийдвэр гарахын өмнө Мин У хийсэн үйлдэлдээ харамсаж байгаагаа илэрхийлж, өөрт нь санаа тавьж ирсэн хүмүүст уучлалт хүссэн байна. Харин цаашид цэргийн албыг дахин хаах эсэх талаар сэтгүүлчдийн асуултад хариулаагүй байна.
