Нийслэлийн 375 жилийн ойн хүрээнд “Хотын гудамж – Миний нутаг” өдөрлөгийг Чингэлтэй дүүрэг, Бага тойруу, Анкарагийн гудамжинд 2 дахь жилдээ зохион байгуулж байна. Энэхүү арга хэмжээ өнөөдөр 12.00 цагаас 17.00 цаг хүртэл үргэлжилнэ.
Тус Анкара гудамжны баярт СУИС-ийн оюутан, сурагчид өөрсдийн дуу, бүжиг, жүжиг гэх мэт уран бүтээлээрээ нийслэлчүүддээ бэлэг барьлаа.Басзураач, барималчдын болон СУИС-ийн дүрслэх урлагийн лицей сургуулийн сурагчдын бүтээлүүдийг дэлгэн тавьж, хэрэв хүсвэл худалдан авах боломж нээлттэй ажээ.
Түүнчлэн хүүхэд, залуусын чөлөөт цагийг зөв боловсон өнгөрүүлэх зорилгоор дартс, сагсан бөмбгийн талбай, дээс зэргийг бэлдэж, уралдаан тэмцээн зохиож, дуучин ард түмэндээ зориулж караоке дэлгэц, микрофон зэргийг байрлуулжээ.
Энэхүү баярыг СУИС-иас зохион байгуулдаг бөгөөд Анкара гудамжинд үйл ажиллагаа явуулдаг аж ахуйн нэгж, байгууллагууд хамтран оролцож байгаа юм. Тэд иргэддээ халуун унд, хөнгөн зууш болонолон төрлийн үйлчилгээ үзүүлж байна.
Энд хүрэлцэн ирэгсэд дуулж, бүжиглэж, түр ч болов бухимдалаа умартаж, сэтгэл хангалуун байгаа нь мэдрэгдэж байлаа.
Дашрамд дуулгахад, бид хоггүй, цэвэр орчинд баярлаж, зугаацаж чаддаг болжээ.
