Дорноговь аймаг дахь Политехник коллежийн 40 жилийн ойн хүрээнд мэргэжлийн уран бүтээлчдийн хамтарсан уламжлалт “Уулын чулуу” үзэсгэлэнгийн нээлт өнгөрсөн баасан гараг /2026.10.09/-т боллоо.
Тус үзэсгэлэн нь 2000 онд Монголын Урчуудын эвлэлийн гишүүн агсан Г.Цагаандэрэм, зураач Б.Үлэмжбат, Монгол Улсын Соёлын тэргүүний ажилтан, Монголын Урчуудын эвлэлийн гишүүн, зураач Л.Халзан нарын эхлүүлсэн уран бүтээлийн уламжлалыг үргэлжлүүлсэнээрээ онцлог юм.
Үзэсгэлэнд гоёл чимэглэл, бэлэг дурсгал, дүрслэх урлаг, гар урлалын чиглэлээр суралцаж төгссөн үе үеийн уран бүтээлчдийн туурвисан уран зураг, уран баримал, сийлбэр, чихмэл, гэрэл зураг зэрэг олон төрлийн бүтээлийг дэлгэжээ.
Тухайлбал, зураач, багш Г.Мөнхзаяагийн усан будгийн бүтээлүүд, зураач Б.Үлэмжбатын тосон зургууд, гэрэл зурагчин Ч.Энхбаатарын говь нутгийн онцлогийг харуулсан гэрэл зургууд, гар урлал, гагнуурын ангийн оюутнуудын урласан сийлбэрүүдийг үзэсгэлэнд толилуулсан байна.
Үе үеийн уран бүтээлчдийн бүтээл туурвилыг нэг дор нэгтгэсэн тус үзэсгэлэн нь коллежийн 40 жилийн түүх, уран бүтээлийн өв уламжлал, төгсөгчдийн ур чадвар, амжилтыг харуулж буйг сургуулийн захиргаанаас мэдээллээ.
