“Грэмми”-ийн шагналт дуучин Бейонсе өөрийн үс арчилгааны “Cécred” брэндийг хөгжмийн уран бүтээлээс нь үл хамааран хэрэглэгчдийн итгэлийг олсон, үр дүнтэй бүтээгдэхүүнээр танигдуулахыг зорьж байгаагаа ярьжээ. Тэрбээр ээж Тина Ноулзын хамт 2024 онд үүсгэн байгуулсан брэндийнхээ талаар “i-D” сэтгүүлд өгсөн шинэ ярилцлагадаа хуваалцсан байна.
“Би бодит асуудлыг шийдэж, үнэхээр үр дүнтэй бүтээгдэхүүн бүтээхийг зорьсон. Ингэснээр миний хөгжимд дургүй хүмүүс хүртэл “Cécred”-ийг хэрэглэдэг байгаасай гэж хүссэн. Учир нь энэ бүтээгдэхүүн үр дүнтэй” хэмээн Бейонсе ярьжээ.
Дуучин мөн өөрийн алдартай нэр хүнд брэндийн амжилтыг тодорхойлох цорын ганц хүчин зүйл байхыг хүсээгүй гэдгээ онцолсон байна. Тэрбээр “Cécred”-ийн үүсгэн байгуулагч, брэндийн үзэл санааг тодорхойлогч, цорын ганц хөрөнгө оруулагч боловч бүтээгдэхүүний сурталчилгааны нүүр царай, загвар өмсөгч байхыг зорьдоггүй аж.
“Cécred” брэнд 2024 онд үсийг цэвэрлэх, ангижруулах, бэхжүүлэх зориулалттай найман бүтээгдэхүүн бүхий цувралаар зах зээлд нэвтэрчээ. Одоо “Cécred” Их Британийн зах зээлд хүрээгээ тэлж байгаа бөгөөд Бейонсе брэндийн цаашдын хөгжлийг зөвхөн өөрийн нэр хүндээр бус, бүтээгдэхүүний чанар, бодит үр дүн, хэрэглэгчдийн итгэлээр тодорхойлуулахыг зорьж байна.
