Холливудын жүжигчин Жонни Депп Чарльз Диккенсийн алдарт “A Christmas Carol” зохиолоос сэдэвлэсэн “Ebenezer” киноныхоо сурталчилгааны хүрээнд Нью-Йорк хотын Брайант паркт Эбенезер Скружийн дүрээр гэнэтийн үзүүлбэр хийжээ.
Тэрбээр Скружийн дүрд бүрэн хувирч, Зул сарын баярын уур амьсгал бүрдүүлж байсан дуучдын тоглолтыг тасалдуулан, Санта Клаусын хувцастай хүнтэй маргалдаж, баярын чимэглэлүүдийг нураан, гацуур модыг унагаасан байна. Мөн амттан тарааж байсан ширээнээс жигнэмэг авч газар шиджээ.
Эдгээр үйлдэл нь жүжигчний бодит зан авир бус, харин удахгүй нээлтээ хийх киноны сурталчилгааны тусгай үзүүлбэр байв. Депп өмнө нь долдугаар сард Сан-Диегогийн “Comic-Con” арга хэмжээний үеэр мөн Скружийн дүрээр гарч ирж байсан юм.
Түүний тоглосон “Ebenezer” кино нь “Карибын тэнгисийн дээрэмчид” цувралын одын томоохон студийн бүтээлд эргэн ирж буй онцгой төсөл болж байна. Жонни Депп хамгийн сүүлд 2018 онд “Fantastic Beasts: The Crimes of Grindelwald” кинонд тоглосноос хойш ийм хэмжээний кинонд гол дүр бүтээгээгүй юм.
Кинонд Депп Эбенезер Скружийн дүрийг бүтээх бөгөөд үйл явдал Зул сарын баярын өмнөх шөнө өрнөнө. Скруж өнгөрсөн, одоо, ирээдүйн сүнснүүдтэй учирснаар амьдрал, хийсэн сонголтоо эргэн харах ер бусын аялалд гардаг тухай өгүүлнэ.
Найруулагчаар аймшгийн төрлийн “X”, “Pearl”, “MaXXXine” бүтээлүүдээрээ танигдсан Тай Уэст ажиллажээ. Киноны жүжигчдийн бүрэлдэхүүнд Руперт Гринт, Андреа Райзборо, Сэм Клафлин, Дэйзи Ридли, Трамелл Тиллман болон Иан Маккеллен нар багтсан байна.
“Ebenezer” кино 2026 оны арваннэгдүгээр сарын 13-нд кино театруудаар нээлтээ хийнэ.
