"Ээж минь дээ" дууг найман настай балчраас эхлээд наян настай буурлууд хүртэл аялах дуртай. 1980-аад оны сүүлчээр олонд түгсэн энэ дууны шүлгийг соёлын гавьяат зүтгэлтэн, яруу найрагч Ч.Дагвадорж бичиж, ая зохиогч, дуучин С.Цэрэнчимид аялгуу зохиожээ. "Ээж минь дээ" хэмээх энэ дуу ээжийн тухай дууны арвин сан хөмрөгийг баяжуулсан сайхан бүтээл болсон гэдэгтэй маргах хүн гарахгүй болов уу. Ингээд та бүхэндээ "Ээж минь дээ" дууны шинэхэн клипыг хүргэж байна.
Ээж минь дээ
Будантай юу буурал хорвоод нь
Бүүвэйлж өсгөсөн ээж минь дээ хө
Буруу юу зөв хоёрыг минь
Ухааруулж өсгөсөн ээж минь дээ хө
Дахилт:
Газар холоос санахад
Гаднаа бүртийж харагдах юм
Галуу шувуу ганганахаар
Таныгаа дуудмаар, дуулмаар болох юм аа
Тоостой юу ганц л хорвоодоо
Торниулж өсгөсөн ээж минь дээ хө
Тоотой юу хэдэн насанд минь
Тоглуулж өсгөсөн ээж минь дээ хө
Дахилт:
Тун чиг холоос санахад
Тоосон дундаас торолзох юм
Тогоруу шувуу буцахаар
Таныгаа дуудмаар, дуулмаар болох юм аа
Нартай юу шаргал хорвоодоо
Намайгаа гэсэн ээж минь дээ хө
Наргиантай юу хэдэн насанд минь
Наадуулж өсгөсөн ээж минь дээ хө
Дахилт:
Нутаг холоос санахад
Нулимсан дунд минь бүрэлзэх юм
Нуурын шувууд ганганахаар
Таныгаа дуудмаар, дуулмаар болох юм аа
www.URLAG.mn
