Холливудын жүжигчин Жэйми Фоксын жил бүр зохион байгуулдаг “Halloween”-ы баярын үеэр нэгэн эрэгтэй хүзүүндээ хутганы шарх авч, цагдаа нар түүний Калифорни дахь гэрт очжээ. Хэрэг гарсантай холбогдуулан нэг хүнийг аюултай зэвсэг ашиглан халдсан байж болзошгүй үндэслэлээр баривчилсан талаар хэвлэлүүд мэдээлэв.
Уг хэрэг арваннэгдүгээр сарын 7-ны бямба гарагийн орой Калифорни мужийн Таузанд-Оукс хотод байрлах Жэйми Фоксын эдлэнд болсон “SKVLK Fest” арга хэмжээний үеэр гарсан байна. TMZ-ийн мэдээлснээр, хохирогчийн хүзүүнд өнгөц шарх үүссэн бөгөөд түргэн тусламжийн ажилтнууд хэргийн газарт анхны тусламж үзүүлжээ.
Вентура тойргийн шерифийн газрын алба хаагчид дуудлагын дагуу очиход баярт оролцож байсан олон зуун зочин арга хэмжээг орхин гарах шаардлагатай болсон байна. Хэргийн дараах дүрс бичлэгт хэд хэдэн хүнийг гавлан авч явж байгаа нь харагджээ.
“SKVLK Fest” нь Жэйми Фокс болон түүний 18 настай охин Анелис нарын жил бүр зохион байгуулдаг “Halloween”-ы сэдэвт хөгжмийн наадам юм. Энэ жилийн арга хэмжээнд Tyga, Ty Dolla $ign, Sexyy Red, Leon Thomas зэрэг уран бүтээлчид оролцож, амьд хөгжмийн тоглолт болон багт наадмын үзвэрүүд зохион байгуулагджээ.
